۹۶ بنسټونو د جرمني حکومت ته په خبرداري سره: له طالبانو سره د اړيکو عادي کول د جنسيت پر بنسټ د آپارتايد د قانوني کولو معنا لري

د طالبانو تر واک لاندې افغانستان ته د افغان کډوالو د بېرته لېږلو په اړه د جرمني د حکومت د تازه پرېکړې په غبرګون کې نږدې سلو مدني او د بشري حقونو مدافع بنسټونو په يوه پرانيستې ليک کې دغه ګام په کلکه غندلی دی.په دې ليک کې چې پرون خپور شوی، ويل شوي چې له طالبانو سره هر ډول هوکړه، تعامل يا د اړيکو عادي کول د افغانستان د اوسني واقعيت له سترګو پټول دي؛ هغه هېواد چې د يوې ډلې تر واک لاندې دی چې په سيستماتيکه توګه د جنسيت پر بنسټ تبعيض، د ښځو حذف او د قومي لږکيو ځپل ترسره کوي.د دې ليک ليکوالان باور لري چې د جرمني د حکومت هڅې د افغان کډوالو د بېرته ستنولو لپاره، «دوزخ ته جبري ستنيدل» دي؛ ځکه د افغانستان اوسنی وضعيت هېڅ ډول د بېرته ستنېدو لپاره خوندي او د منلو وړ نه دی.په ليک کې دا هم ټينګار شوی چې طالبان يو مشروع حکومت نه، بلکې يوه وسله واله ډله ده چې د ترهګرۍ او جنايت سابقه لري او ښځې، خبريالان، مدني فعالان او لږکي يې موخه ګرځولې ده.په همدې حال کې، د ملګرو ملتونو سازمان هم د جرمني د دې پرېکړې په اړه اندېښنه ښودلې او دا يې د نړيوالو قوانينو خلاف بللې ده.د ملګرو ملتونو د بشري حقونو عالي کمېشنرۍ خبرداری ورکړی چې د افغانانو جبري بېرته لېږل د «نه ستنولو» اصل نقض دی او د ډېرو کسانو ژوند له خطر سره مخامخ کوي.څو ورځې وړاندې، جرمني د طالبانو له واک ته رسېدو وروسته دويم ځل ۸۱ تنه افغان نارينه د لايپزيګ ښار څخه کابل ته ولېږل. د جرمني د کورنيو چارو وزارت ويلي چې دغه کسان جنايي دوسيې لري، خو د بشري حقونو فعالان خبرداری ورکوي چې په روان حالت کې حتٰی د جرم سابقه لرونکي کسان هم بايد د عادلانه محکمې او بشري ملاتړ حق ولري.د ليک لاسليک کوونکي د کډوالو د ایستلو د ژر تر ژره درولو او له طالبانو سره د هر ډول غيرشفافو خبرو اترو د پای ته رسېدو غوښتنه کوي. د دوی په باور، طالبانو ته مشروعيت ورکول په عمل کې د داسې رژيم د پياوړتيا معنا لري چې د ښځو له ټولنيز ژوند څخه د حذفولو پاليسي يې رسمي کړې ده.