د ښځو د ازادۍ په لور غورځنګ په کابل کې د طالبانو وروستۍ نيونې وغندلې

د ښځو د ازادۍ په لور غورځنګ په يوه خپره کړې اعلاميه کې د طالبانو له خوا په کابل کې د ښځو ډله‌ييزې نيونې په کلکه غندلې او دا يې د «جنسيت‌پر بنسټ آپارتايد» ښکاره نښه بللې ده.په دې اعلاميه کې ويل شوي چې ښځې يوازې د پوښښ د ډول د انتخاب يا په ټولنه کې د شتون له امله خپل‌سري نيونې زغمي، په داسې حال کې چې دغه کړنې د بشري بنسټيزو حقونو ښکاره نقض دی؛ په ځانګړې توګه د آزادۍ، کرامت او برابرۍ حق.دغه غورځنګ خبرداری ورکړی چې د ښځو پر ضد د دې ډول تګلارو دوام ټولنه نور هم د ځپنې، وېرې او چوپتيا پر لور بيايي او افغان ښځې نور د دې ظلم د زغملو وس نه لري. په اعلاميه کې ټينګار شوی چې «د دې ښځو يوازينی جرم د دوی ښځې‌توب دی.»د ښځو د ازادۍ په لور غورځنګ له افغان ولس غوښتي چې د دغو ځپنو پر وړاندې بې‌پرده پاتې نه شي او په يو والي سره د خپل اعتراض غږ پورته کړي. په يوه برخه کې راغلي: «زموږ چوپتيا د ظلم د دوام زمينه برابروي.»دغه غورځنګ همدارنګه له نړيوالو بنسټونو، ملګرو ملتونو او د بشري حقونو له مدافع هېوادونو غوښتنه کړې چې په ښکاره ډول له طالبانو سره خپله دريځ څرګند کړي او د دې لړۍ د درولو لپاره له ديپلوماتيکو او حقوقي وسايلو کار واخلي. هغوی همدارنګه د هغو ښځو د سياسي او حقوقي ملاتړ غوښتنه کړې چې د ازادۍ او عدالت لپاره د مبارزې له امله له ګواښ سره مخ دي.