ریچارد بنت: په کابل کې د ښځو نیول د طالبانو له خوا د سیستماتیک جنسیتي ځپنې نښه ده

ریچارد بنت، چې د افغانستان لپاره د ملګرو ملتونو ځانګړی د بشري حقونو راپور ورکوونکی دی، په کابل کې د ښځو او نجونو د پراخې نیونې په غبرګون کې ویلي چې دغه کړنې د «پوښښ د دستورونو د نقض» له امله ترسره شوي او د ۲۰۲۴ کال د پیل د ځپنو یاد تازه کوي، خو دا ځل راپورونه د لا سخت تاوتریخوالي خبر ورکوي.
بنت په خپله د ایکس په پاڼه کې په یوه خپاره کړي پیغام کې ټینګار کړی چې دا لړۍ د طالبانو د ښځو ضد سرکوب‌کوونکو پالیسیو یوه دوامداره برخه ده چې د افغان وګړو په منځ کې د ویرې او وحشت فضا رامنځته کړې ده.
هغه له نړیوالې ټولنې غوښتي چې له خوشي کېدو وروسته دې له دغو ښځو سره ملاتړ وکړي او ورته بېړني رواني، حقوقي او بشري خدمتونه برابر کړي.
له دې سره، په افغانستان کې د ملګرو ملتونو د مرستیال دفتر (یوناما) هم د جولای له ۱۶ څخه تر ۱۹ پورې په کابل کې د ډېرو ښځو او نجونو د نیونې په اړه خپله ژوره اندېښنه څرګنده کړې ده.
د یوناما په اعلامیه کې ویل شوي چې دغه نیونې د طالبانو د امر بالمعروف ځواکونو له خوا او د «حجاب د نه رعایت» په تور ترسره شوې دي.
یوناما ویلي چې د دې نیونو د نورو جزییاتو د ترلاسه کولو لپاره له طالب چارواکو سره په خبرو بوخته ده.
یوناما خبرداری ورکړی چې د دې کړنو دوام د ښځو بنسټیزو حقونو ښکاره نقض دی او د افغانستان له نړیوالو ژمنو سره په ټکر کې دی.
دا هم باید وویل شي چې له هغه وخته چې طالبان په اګست ۲۰۲۱ کې بېرته واک ته رسېدلي، افغان ښځې او نجونې په منظم ډول له زده‌کړې، کار، آزاد سفر او په ټولنیز ژوند کې له ګډون څخه بې‌برخې شوې دي، چې دغه وضعیت د بشري حقونو ادارو له خوا د «جنسیتي آپارتاید» په توګه یاد شوی دی.