د افغانستان د خبریالانو د ملاتړ سازمان: په ایران او پاکستان کې د افغان خبریالانو وضعیت د اندېښنې وړ دی

د افغانستان د خبریالانو د ملاتړ سازمان په یوه خپره شوې خبرپاڼه کې په ګاونډیو هېوادونو، په ځانګړي ډول ایران او پاکستان کې د افغان پناه غوښتونکو خبریالانو د ناورین وضعیت په اړه خپله ژوره اندېښنه څرګنده کړې ده.
په دې خبرپاڼه کې ویل شوي چې د موثقو معلوماتو له مخې افغان خبریالان په دغو هېوادونو کې د ګواښ، خپل‌سري نیونې، جبري ایستنې او د بنسټیزو خدمتونو ته د لاسرسي له جدي بندیزونه سره مخ دي. د دې ادارې په وینا، له دې زیان‌منې طبقې سره غیرانساني چلند د بشري حقونو ښکاره نقض دی.
دا سازمان زیاتوي چې ډېری هغه خبریالان چې د رسنیزو فعالیتونو او د سانسور او سیاسي فشارونو پر وړاندې د درېدو له امله یې افغانستان پرېښی دی، اوس په ناڅرګندې اقامتي وضعه کې ژوند کوي؛ یوه وضعه چې د دوی د انساني کرامت او ان د دوی د ژوند لپاره ګواښ دی.
په یوې برخې کې ویل شوي چې په پاکستان کې د افغان خبریالانو د وېزې د تمدید بهیر درېدلی او ګڼ شمېر خبریالان په بې‌برخلیک حالت کې دي. همداراز په ایران کې د امنیتي ځواکونو چلند له افغان خبریالانو سره په ډېرو برخو کې «له انساني کرامت څخه بې‌برخې» بلل شوی دی.
دې سازمان له نړېوالو بنسټونو غوښتي چې د افغان خبریالانو د ساتنې لپاره عاجل ګامونه واخلي او په ځانګړي ډول لاندې ټکو ته پام وکړي:

د خبریالانو د خپل‌سري نیونې او جبري ایستنې مخنیوی؛
په خوندي هېوادونو کې د هغوی د بیا میشتېدو پروسه اسانه کول؛
تر دایمي حل پورې د قانوني اوسیدلو تمدید؛
روغتیا، زده‌کړې او نورو بنسټیزو خدمتونو ته د لاسرسي زمینه برابرول؛
او د نړېوالو بنسټونو څارنه د دغو خبریالانو د بشري حقونو پر وضعیت.

د افغانستان د خبریالانو د ملاتړ سازمان په پای کې له بنسټونو لکه ملګرو ملتونو، د کډوالو عالي کمیشنرۍ، اروپایي ټولنې او د بې‌پولې خبریالانو سازمان څخه غوښتنه کړې چې د دې وضعیت په وړاندې چوپ پاتې نشي او د افغان خبریالانو غږ شي.