کرزی د ۱۴۰۴ کال د کانکور له بریالیو څخه ستاینه وکړه او د نجونو د ښوونځیو د پرانېستلو غوښتنه یې وکړه

حامد کرزی، د افغانستان پخواني ولسمشر، په يوه پیغام کې د ۱۴۰۴ لمریز کال په سراسري کانکور کې د هېواد د يو شمېر ځوانانو له برياوو خوښي څرګنده کړه او له لومړي څخه تر پنځم مقام ترلاسه کوونکو زده‌کوونکو ته يې مبارکي ورکړه. کرزي په دې پیغام کې د زده‌کوونکو د هڅو ستاينه کړې خو د نجونو له نه شتون څخه په کانکور کې ژوره خواشيني ښودلې ده.هغه ټينګار کړی چې د نجونو او هلکانو لپاره د زده‌کړې فرصتونه برابرول د هېواد د پرمختګ لپاره حياتي دي.پخواني ولسمشر طالبانو ته غوښتنه کړې چې ژر تر ژره د نجونو پر مخ تړل شوي ښوونځي او پوهنتونونه بېرته پرانيزي، څو افغانستان د خپلو بچيانو په علمي او تخصصي وړتياوو تکيه وکړي او د ځان بسياينې او پرمختګ لاره خپله کړي.له هغه وخته چې طالبان د ۱۴۰۰ کال په اسد کې بېرته واک ته رسېدلي دي، په منځنيو او لوړو زده‌کړو کې د نجونو پر زده‌کړو بنديز لګېدلی دی.ميليونونه نجونې له زده‌کړو بې‌برخې دي چې دا موضوع په ملي او نړيواله کچه پراخې اندېښنې راپارولي دي. سږنی کانکور هم د نجونو له ګډون پرته ترسره شو چې د هېواد علمي ټولنه یې سخته اغېزمنه کړې ده.حامد کرزی د هېواد له هغو لږو سياسي څېرو څخه دی چې څو څو ځله یې د نجونو د ښوونځيو د بيا پرانيستلو غوښتنه کړې او د نجونو د زده‌کړو دوامداره محروميت یې د افغانستان د راتلونکي لپاره يو لوی خنډ بللی دی.