په غور کې مرګونی پېښه؛ د ملګرو ملتونو د کاروان موټر د دوو ماشومانو ژوند واخېست

په غور ولايت کې په يوه ترافيکي پېښه کې دوه واړه ماشومان چې د يو بې‌ځايه شوې کورنۍ غړي وو، خپل ژوند له لاسه ورکړی دی.دا پېښه پرون د فيروزکوه–دولتيار پر سړک د «پشته گاومورک» په سيمه کې رامنځته شوې ده.د قربانيانو خپلوان وايي چې ۸ کلنه مسعوده او ۴ کلنه ستايش هغه مهال د سړک پر غاړه ولاړې وې چې د سړک د اوښتو په هڅه کې پرې د ملګرو ملتونو د مامورينو (يوناما او UNDP) د ساتونکو موټر ور ټکر کړی دی.د دغو ماشومانو کورنۍ د ساتونکو د موټر د چلوونکي بې‌احتياطي د پېښې اصلي لامل بولي او له مسؤلو ادارو غواړي چې دا پېښه په جدي ډول وڅېړي.د دې دوو ماشومانو پلار چې د صلاح‌الدين په مستعار نوم ياد شوی، رسنيو ته ويلي چې د ساتونکو موټر د ترافيکي اصولو له مراعات پرته او په زياته تېزۍ روان و.دی ټينګار کوي چې د دوی کورنۍ د کورنيو بې‌ځايه شويو له ډلې ده چې د تېر کال د ويجاړوونکو سېلابونو له امله يې خپل کور له لاسه ورکړی او د فيروزکوه ښار په څنډه کې په پشته گاومورک سيمه کې مېشته شوې ده.ځايي سرچينې هم دا پېښه تاييدوي او د معياري سړکونو د نه شتون او د ځينو چلوونکو لخوا د ترافيکي اصولو د نه مراعات له امله اندېښنه څرګندوي.د غور اوسېدونکي وايي چې له کلونو راهيسې د مناسب سړک د نشتوالي شکايت لري، خو تر اوسه ورته جدي پاملرنه نه ده شوې.دا پېښه يو ځل بيا په غور ولايت کې د ټرانسپورټي زيربناوو خراب وضعيت او هغه ګواښونه چې له ډېرو ځپلو کورنيو، په ځانګړي ډول ماشومانو سره مخ دي، خلکو ته يادونه کوي.تر اوسه د دې پېښې په اړه د ملګرو ملتونو اړوندو ادارو کوم رسمي غبرګون نه دی خپور شوی.