آريانا سعيد: د افغان نجونو د وضعیت په وړاندې افغان سړي بې‌پروا دي

آريانا سعيد، چې يوه افغان سندرغاړې او د ښځو د حقونو له مدافعانو څخه ده، په يوه ويډيويي پيغام کې ويلي چې سلګونه زره بېرته راستنېدونکي کډوال، په ځانګړي ډول ښځې، په بشپړه توګه په بې‌سرنوشتۍ کې ژوند کوي.هغې د طالبانو له غيرانساني چلند څخه په ځانګړي ډول د کابل په ولایت کې د وروستيو ورځو د نجونو د نیونو په اړه کلکه نيوکه کړې او ويلي يې دي چې د افغان سړيو بې‌پروايي د دې وضعيت په وړاندې د اندېښنې وړ ده.له څو ورځو راهيسې په ټولنيزو رسنيو کې داسې ويډيوګانې خپرې شوې دي چې د طالبانو کسان نجونې د کابل له واټونو نيسي او د امر بالمعروف ادارې ته يې وړي.آريانا سعيد وايي: «طالبان د خلکو د ستونزو د حل پر ځای هره ورځ په بېلابېلو طريقو د نجونو د ځورونې او نیونې په هڅه کې دي.»هغې له ټولو افغان وګړو غوښتنه کړې چې د دې وضعيت په وړاندې يو موټی شي او د ښځو د ملاتړ لپاره راپورته شي، څو نور خلک مجبوره نه شي چې له خپلو کورونو تښتي يا د دې ډلې په زندانونو کې شپې ورځې تېروي.له هغه وخت راهيسې چې طالبان واک ته رسېدلي، ميليونونه نجونې له زده‌کړې محرومې شوې دي او په ډېرو مواردو کې د امر بالمعروف د مامورانو له خوا ځورول شوې دي.دا په داسې حال کې ده چې د طالبانو د امر بالمعروف ادارې مامورينو د ګاونډيو هېوادونو څخه د کډوالو د ستنېدو او د کډوالو د کړکېچ تر سيوري لاندې په کابل کې تر ۱۰۰ زياتې ځوانې نجونې له واټونو نيولي دي.د ښځو د ملاتړ له نورو سازمانونو سره په څنګ کې يوناما هم له طالبانو غوښتي چې د نجونو د نیونې لړۍ ژر ودروي.