د افغانستان د ښځو د آزادۍ او اندېښنې بنسټ: طالبانو له ۱۰۰ ډېرو ښځو نيول د بشريت پر وړاندې جنايت دی

د افغانستان د ښځو د آزادۍ او اندېښنې بنسټ په يوه تازه اعلاميه کې په کابل کې د طالبانو لخوا د له ۱۰۰ ډېرو ښځو او نجونو د نيولو او تښتولو له امله ژوره اندېښنه ښودلې او دغه کړنه يې په کلکه غندلې ده.په اعلاميه کې ويل شوي چې دغه ښځې د پلازمېنې له بېلابېلو سيمو نيول شوې دي او د دوی د برخليک په اړه هېڅ معلومات نشته.دې بنسټ د طالبانو چلند «وحشيانه، غير انساني او د دې ډلې د ښځه‌ضد سياستونو برخه» بللی دی.د ښځو د آزادۍ او اندېښنې بنسټ ټينګار کړی چې د دې ډول نيونو دوام په ښکاره ډول د بشر د حقونو او نړيوالو اصولو نقض دی او خبرداری يې ورکړی چې پر دغو ښځو هر ډول زيان رسول د بشريت پر وړاندې جنايت دی چې عاملين او امرکوونکي يې به له قانوني او سياسي پايلو سره مخامخ شي.دغه بنسټ له ملګرو ملتونو، د بشر حقونو له بنسټونو او اغېز لرونکو هېوادونو غوښتي چې د دغو نيونو په وړاندې چوپ پاتې نه شي او د دې ښځو د ژر خوشې کولو لپاره له ټولو شته لارو په ځانګړې توګه د ديپلوماټيکي او حقوقي فشارونو کار واخلي.په اعلاميه کې په پای کې ويل شوي: «د افغانستان ښځې د طالباني نظام برمته نه دي. موږ د آزادۍ، عدالت او انساني کرامت لپاره درېږو.»دا په داسې حال کې ده چې طالبانو په کابل کې لسګونه ښځې او نجونې د هغه څه په تور چې دوی يې «د اسلامي حجاب نه مراعت» بولي، نيولي دي. دغه نيونې د «امر بالمعروف او نهي عن المنکر» ادارې لخوا شوې دي او په داسې سيمو کې راپور شوي دي لکه دشت برچي، شهرنو او کوته‌سنگي.