اوچا: د بوديجې کموالی په افغانستان کې اړمنو خلکو ته د څو اړخيز ځواب وړاندې کولو مخه نيولې ده

د ملګرو ملتونو د بشردوستانه چارو د همغږۍ دفتر (اوچا) په خپل تازه کلني راپور کې ويلي چې سره له دې چې په ۲۰۲۴ کال کې تر ۲۲ ميليونو ډېر افغانان مرستو ته رسېدلي، خو د بوديجې کمښت او عملي خنډونه اړمنو خلکو ته د څو اړخيزو مرستو د وړاندې کولو مخه نيولې ده.د راپور له مخې، د ۲۰۲۴ کال په اوږدو کې بشردوستانه همکارانو لږ تر لږه يو ډول مرسته ۲۲.۴ ميليونه کسانو ته رسولې ده چې دا شمېر د ټاکل شوي هدف (۱۷.۳ ميليونه) څخه ډېر دی.خو ډېری مرستې د خوړو په وېش راټولې شوې وې او له دې شمېرې څخه ۱۴.۹ ميليونه کسانو يوازې د خوراکي توکو مرسته ترلاسه کړې ده.په همدې حال کې، يوازې ۳.۱ ميليونه کسان چې د منځمهالي هدف (۷.۶ ميليونه) ۴۱ سلنه جوړوي، په يوه مياشت کې په درېيو بېلابېلو برخو لکه خواړه، روغتيا، اوبو او بېړنۍ سرپناه کې مرسته ترلاسه کړې ده.دا لوی تشه ښيي چې څو اړخيزه ځواب ورکونه لا هم په اړين ډول نه ده عملي شوې او ميليونه خلک په سخت اړتيا کې دي.راپور زياتوي چې د ۲۰۲۴ کال تر پايه د اړتيا وړ ۳.۰۶ ميليارده ډالري بوديجې يوازې ۴۷ سلنه برابر شوې وه. دا شمېر د ځينو ناوخته راپورونو په اضافه کېدو سره د ۲۰۲۵ کال د می تر مياشتې ۵۳ سلنه (۱.۶۳ ميليارده ډالر) ته لوړ شوی، خو لا هم ۱.۴۳ ميليارده ډالر کسر پاتې دی.د اوبو او حفظ‌الصحې (WASH) او روغتيا په څېر برخو ته د بوديجې کم برابرېدل چې هره يوه يې د ۱۰ ميليونو کسانو د خدمت موخه لرله، د ناروغيو د خپرېدو، خوارځواکۍ او د مخنيوي وړ مړينو خطر زيات کړی دی.اوچا خبرداری ورکړی چې که بوديجه ژر زياته نه شي او په څو اړخيزو مرستو تمرکز ونه شي، په افغانستان کې د ميليونو خلکو حالت به لا پسې خراب شي.