په غور کې جبري کډه: طالبانو د شپږ کلي خلک له خپلو کورونو وشړل

ځايي سرچينو په غور ولايت کې ويلي چې طالبانو د جمعې په ورځ، د ۲۷ سرطان په نېټه، د دولتيار ولسوالۍ کشرو درې محاصره کړه او د دغې درې د شپږو کليو خلکو ته يې د بېړنۍ جبري کډې امر وکړ. دغه کلي دي: سنگ‌شوره، دروازه، دهن‌غوری، جیره‌گک، نرم‌تاب او حاجي‌آباد.د سرچينو په وينا، د چهارشنبې په ورځ، ١ د زمري په نېټه، د دې سيمې وروستی کلی سنگ‌شوره هم له خلکو تش کړای شو.راپورونه وايي چې له ۶۰۰ ډېرو کورنيو په دې شپږو کليو کې مېشتې وې، چې د ځايي خلکو په خبره، دوی له دوه سوه کالو ډېر پخوا راهيسې په همدې ځاى کې ژوند کاوه.ځايي سرچينې «راوي زن» ته ويلي چې د طالبانو د علماوو شورا د دغې سيمې ځمکې چې د تايماني قوم په موروثي ډول ملکيت وې، د سردار قوم په ګټه پرېکړه کړې ده. د سردار قوم خلک ځان د محمدزايي ټبر او د پخواني پاچا محمد ظاهر خان خپلوان بولي.د کليو اوسېدونکو رسنيو ته انځورونه او ويډيوګانې استولي دي او د طالبانو دا کار يې «ښکاره ظلم» او «د ځمکو غصب» بللی دی.دوی احمدشاه دين‌دوست چې د غور پخوانی والي او اوس په کندهار کې د «البدر» قول اردو قوماندان دی، تورن کړی چې د سردار قوم ملاتړ کوي.د ځايي خلکو په خبره، طالبانو د دې پرېکړې له مخې شاوخوا ۸۰۰ زره جريب ځمکه، درې هلکانو او نجونو ښوونځي په زور نيولي او نژدې ۵ زره تنه يې له خپلو کورونو او کليو شړلي دي.ځينې بې‌کوره شوي خلک وايي چې د دې جبري کډې اصلي لامل دا دی چې د تايماني قوم ځوانانو د پخواني حکومت په محلي پوليسو کې دنده لرله او اوس طالبان د همدې په بدل کې انتقام اخلي او خلک يې د وسلې په زور له خپلو ځايونو ايستلي دي.