یوناما: بېرته ستانه شوي افغانان له تعقیب، زورزیاتي او ګواښ سره مخ دي

د افغانستان لپاره د ملګرو ملتونو مرستندویه دفتر (یوناما) او د بشري حقونو دفتر په خپل تازه راپور کې خبرداری ورکړی چې ګڼ شمېر افغانان چې په زور له ګاونډيو هېوادونو په ځانګړي ډول له ايران او پاکستان څخه بېرته افغانستان ته ستانه کړل شوي، له سختو ګواښونو، زورزیاتي او تعقیب سره مخامخ شوي دي.دا راپور نن پنجشنبه (۲ د زمری) خپور شوی او په کې ګڼې بېلګې ثبت شوې دي چې له مخې یې بېرته ستانه شوي کسان د بې‌اساسه نیونو، پراخو وېرو او بد چلند سره مخامخ شوي دي. په ځانګړې توګه ښځې او نجونې، د پخواني حکومت کارکوونکي، خبریالان او د مدني ټولنې فعالان تر ټولو ډېر له خطر سره مخ دي.په راپور کې د یوه پخواني دولتي مامور کيسه هم راغلې چې وايي، کله چې بېرته افغانستان ته ستون شو، نیول شوی او د پلټنو پر مهال په لښتې، لرګي او کیبل وهل شوی دی. دغه راز د اوبو لاندې د خفګۍ او اعدام د ګواښ زورزیاتی یې هم ګاللی دی.راپور زیاتوي چې د هغو کسانو بېرته ستنول چې په خپل هېواد کې له زورزیاتي، تعقیب يا جبري ورک کېدو سره مخ دي، د نړيوال قانون ښکاره سرغړونه بلل کېږي.ملګرو ملتونو له کوربه هېوادونو غوښتي چې د افغانانو د بېرته ستنولو څخه مخکې د هر چا شخصي وضعیت په دقت وارزوي او هغه څوک چې له ګواښ سره مخ دي، بېرته ونه ستنوي.دا راپور په داسې حال کې خپرېږي چې په تېرو ۱۸ مياشتو کې زرګونه افغانان په زور له ايران او پاکستانه بېرته ستانه کړل شوي او د دوی د امنيت او حقونو په اړه پراخې اندېښنې راپورته شوې دي.