د ایران چارواکو تازه خبرداری: له ناقانونه کډوالو سره هر ډول مرسته قانوني تعقیب لري

د ایران سیمه‌ییزو چارواکو خبرداری ورکړی چې له هغو کډوالو سره چې قانوني اسناد نه لري، په ځانګړې توګه له هغو چې د سرشمېرنې پاڼې یې باطلې شوي، هر ډول مرسته جرم بلل کېږي، او د مرستې کوونکي اشخاص یا ادارې عدلي او قضايي ارګانونو ته ورپيژندل کېږي.د فارس ولایت د کډوالو او بهرنیو چارو عمومي رئیس، مجید احمدي ویلي چې د هغو کډوالو اقامت چې د سرشمېرنې پاڼې یې نوره اعتبار نه لري، غیرقانوني بلل کېږي، او پاتې کېدل یې د ایران له قوانینو سره په ټکر کې دي.د هغه په وینا، له دغو کډوالو سره هر ډول همکاري، لکه د استوګنې برابرول، د کار زمینې برابرول یا د زده‌کړې اجازه ورکول، د قانوني پیگرد لامل ګرځي.په تېرو کلونو کې له دوو میلیونو ډېر کډوالو ته د سرشمېرنې پاڼې ورکړل شوې وې، خو د روان کال له پیله دا اسناد نور اعتبار نه لري.چارواکو مخکې ویلي و چې تر ۱۵ چنګاښ (جولای ۵) پورې باید د سرشمېرنې لرونکي کډوال ایران پرېږدي، خو تازه راپورونه ښيي چې دا نېټه تر ۱۵ وږي (سپتمبر ۵) پورې غځول شوې ده.خو د فارس د کډوالو رئیس وایي، دا مهلت د فارس لپاره نه‌دی تمدید شوی او اخري نیټه یې هماغه ۱۵ چنګاښ و؛ په ځانګړې توګه ددې لامله چې د کډوالو زده‌کوونکو د ښوونیز کال پای ته ورسید.د رسمي ارقامو له مخې، یوازې په تېرو څلورو میاشتو کې، له یو میلیون ډېر کډوال له ایرانه وتلي دي، چې شاوخوا ۷۵۰ زره تنه یې له اسلام‌قلعه څخه هرات ته دننه شوي دي.له دې مخکې، ایراني چارواکو د بې‌مدرکه کډوالو شمېر شاوخوا دوه میلیونه او د سرشمېرنې پاڼې لرونکو کډوالو شمېر هم دوه میلیونه ښودلی و. اوس چې د دې پاڼو اعتبار لغوه شوی، دواړه ډلې «ناقانونه» بلل کېږي او د وتلو تر فشار لاندې دي.دا فشارونه په داسې حال کې زیات شوي چې لا هم په افغانستان کې ناامني، بیکاري، بيوزلي او د لومړنیو خدماتو نشتوالی دوام لري، او جبري ستنیدنه د دغو کورنیو لپاره له نوو کړکیچونو سره مل ده.