طالبانو په پکتیا کې دوه کسان د غلا په جرم په عام محضر کې په دورې وهلي

د طالبانو عالي محکمه ویلي چې دوه کسان یې د پکتیا ولایت د څمکنۍ ولسوالۍ په اړوند د غلا په تور محکوم کړي او زندان او دوره سزاګانې پرې صادرې کړي دي.په هغه خبرپاڼه کې چې د یکشنبې په ورځ، د زمري ۵ مه، له خوا خپره شوه ویل شوي چې یو تن ته د لسو میاشتو او بل تن ته د اتو میاشتو بند سزا ورکړل شوې ده. د حکم له مخې دواړو کسانو ته د خلکو په وړاندې ۳۰ څخه تر ۳۹ پورې په دورو وهل شوي دي.د طالبانو له خوا د دې ډول بدني سزاګانو پلي کول چې دوی ورته « شرعي حد» وايي، بیا هم د بشري حقونو د نقض او د عادلانه محاکمې د نه شتون په اړه اندېښنې راپورته کړي دي.دا په داسې حال کې ده چې یوازې یوه ورځ مخکې، شپږ نورو کسانو هم په کابل ښار کې د مختلفو تورونو له مخې د طالبانو له خوا دوره شوي دي.له هغه راهیسې چې طالبان د زمري میاشتې د ۱۴۰۰ کال کې واک ته رسيدلي دي، دغه ډلې په عام محضر کې د دودیزو او سختو سزاګانو د تطبیق لاره غوره کړې ده. ډېری وختونه د تورنو کسانو محاکمې په پټه او د دروازو تر شا ترسره کېږي او د شواهدو وړاندې کولو او د تورنو د حقونو د رعایت په برخه کې کافي روڼتيا نه شته.بشري حقونو سازمانونو څو ځله له طالبانو غوښتي چې د بدني سزاګانو پلي کول ودروي او د عادلانه محاکمې اصولو ته درناوی وکړي. د دغو ادارو په باور، دورې وهل، د بدن غړي پرې کول او علني اعدامونه د نړیوالو بشري حقونو له قوانینو سرغړونه ده او دینی یا قانوني توجیه نه شي کېدای.