د بشر حقونو د څار سازمان: طالبانو د حجاب له قوانینو سره د افغان ښځو ازادي تر فشار لاندې راوستې

د بشر حقونو د څار سازمان (Human Rights Watch) په خپل وروستي راپور کې ویلي، چې طالبانو په وروستیو میاشتو کې لسګونه ښځې او نجونې د «د حجاب د قوانینو د سرغړونې» په تور په کابل کې نیولي دي.دغه سازمان دا کړنه د طالبانو د سرکوب‌کوونکو پالیسیو یوه برخه بللې، چې د افغان ښځو اساسي حقونه او ازادي محدودوي.د راپور له مخې، طالبانو له اګست ۲۰۲۴ راهیسې سخت قوانین پلي کړي، چې له مخې یې ښځې اړې دي خپل بدن او مخ په عامه ځایونو کې په بشپړ ډول پټ کړي. د دغو مقرراتو هر ډول سرغړونه د نیولو او سختو چلندونو لامل کېږي.د بشر حقونو د څار سازمان ټینګار کړی، چې دا نیونې د افغانستان د ښځو او نجونو تر منځ د وېرې او ګواښ فضا رامنځته کړې او د هغوی خپلواکي له جدي خطر سره مخ کړې ده.یوه له نیول شوو ښځو څخه، چې په مستعار نوم «ساران» سره یې خبرې شوي، ویلي: «نن سبا نور د بدحجابۍ کوم مفهوم نشته، خو سره له دومره بندیزونو، ښځې هڅه کوي خپل حجاب ته رنګ او ښکلا ورکړي او خپل حضور وساتي.»دغه سازمان له نړیوالې ټولنې غوښتي، چې پر طالبانو فشارونه زیات کړي، تر څو دا سرکوب‌کوونکې څپه او نیونې ودروي او د افغان ښځو ملاتړ وکړي.یاده دې وي، چې په وروستیو ورځو کې طالبانو یو ځل بیا د هغو نجونو د نیولو لړۍ پیل کړې، چې دوی یې «د حجاب نه مراعات کول» بولي؛ دا چاره د خلکو، په ځانګړي ډول د ښځو، ترمنځ پراخې اندېښنې راوپارولې دي.دغه نیونې تر ډېره د کابل په لوېدیځو او مرکزي سیمو کې ترسره شوي، چې په کې د دشت برچي، شهرنو، کوټه‌سنگي او قلعه‌فتح‌الله سیمې شاملې دي.