ترنم سېدۍ کرزي ته په یوه لیک کې: د دې هېواد نجونې د ناسمو سیاستونو قرباني شوې دي

ترنم سېدۍ، د افغانستان د ښځو د سیاسي ګډون د شبکې مشره او یو پېژندل شوی مدني شخصیت، په یوه پرانیستي لیک کې د افغانستان پخواني ولسمشر حامد کرزي ته لیکلي چې د خپل سیاسي ځای او نفوذ څخه د اوسني کړکېچ د پای ته رسولو لپاره کار واخلي.سېدۍ په دې لیک کې د طالبانو په وړاندې د حامد کرزي د تېر سیاست او په افغانستان کې د اوسني واکمن جوړښت په رامنځته کولو کې د هغه رول تر نیوکې لاندې راوستی او لیکلي یې دي:«هغه بهیر چې د سولې په نوم پيل شو، لاره یې یوې داسې ملي او انساني ناورین ته هواره کړه چې نن ورځ ورسره مخ یو.»هغې د افغانستان د ښځو او نجونو له سخت وضعیت څخه یادونه کړې او له پخواني ولسمشره پوښتنه کړې:«ایا د افغانستان نورو نجونو د زده‌کړې، خوب لیدلو او وده کولو حق نه لري؟»ترنم سېدۍ، چې د کرزي د واکمنۍ پر مهال افغانستان ته راستنه شوې وه، د تېرو کلونو له مایوسیو او کړاوونو یادونه کړې او له کرزي یې غوښتي چې د هېواد د ژغورنې لپاره یو نوی بهیر پیل کړي. هغه وړاندیزونه لکه د لنډمهالي حکومت جوړېدل، د آزادو انتخاباتو ترسره کول، د ملي جرګې رابلل او د یو مشروع سیاسي نظام بیا جوړول وړاندې کړي دي.سېدۍ ټینګار کړی:«موږ چمتو یو چې په دې لاره کې له تاسو سره ملګري و اوسو. راشئ، یو ځل بیا، په زړورتیا سره، یو نوی پيل وکړئ.»دا لیک د ټولنیزو رسنیو کاروونکو، سیاسي او مدني فعالانو تر منځ پراخ غبرګونونه راپارولي، او ډېرو دا د هغه نسل رښتینې غږ بللی چې د وطن د بیرته راستنېدو په هیله، د تېرو ناکامو سیاستونو قرباني شوي دي.