د کډوالۍ نړیوال سازمان: یوازې په دوو اوونیو کې له ایران څخه له ۳۷۰ زرو زیات افغان کډوال بېرته ستانه شوي

د کډوالۍ نړیوال سازمان (IOM) اعلان کړی، چې د جولای میاشتې په وروستیو دوو اوونیو کې له ایران څخه له ۳۷۰ زرو زیات افغان کډوال افغانستان ته بېرته راستانه شوي دي.د IOM د راپور له مخې، ډېری بېرته ستنېدونکي کډوال بې داریي، بې‌ مدرکه او له هر ډول لومړني ملاتړ پرته هېواد ته راګرځي. زیان‌منونکي قشرونه، په ځانګړي ډول ښځې، ماشومان، زړښت رسېدلي کسان او ناروغان، تر ټولو ډېرې عاجلې مرستې ته اړتیا لري.د IOM ویاند ویلي: «زموږ ډلې په پولو کې شتون لري او لومړنۍ مرستې لکه خواړه، اوبه، روغتیايي پاملرنه او موقتي اوسیدو ځای برابرېږي، خو د کړکېچ کچه له موجودو امکاناتو لوړه ده.»د ملګرو ملتونو د بشري مرستو د همغږۍ دفتر (OCHA)، د ملګرو ملتونو د کډوالو عالي کمېشنري (UNHCR) او د ملګرو ملتونو د ماشومانو صندوق (UNICEF) هم جلا راپورونه خپاره کړي او د افغان کډوالو د خراب وضعیت په اړه یې خبرداری ورکړی.د UNHCR په وینا، د ګاونډیو هېوادونو، په تېره بیا د ایران او پاکستان محدودوونکي سیاستونه، د کډوالو پر ژوند سخت فشار راوستی، او د هغوی اجباري یا داوطلبانه بېرته ستنیدنه پرته له لازم ملاتړ څخه، یو جدي بشري بحران رامنځته کړی دی.اوچا ویلي چې دا مهال شاوخوا ۲۵ میلیونه افغانان بشري مرستو ته اړتیا لري، او د کډوالو د بېرته ستنیدو نوې څپه دغه فشار بې‌ساري لوړ کړی دی. دا دفتر د نړیوالو مرستو د بودیجې د سمدستي زیاتوالي غوښتنه کړې.یونیسف د بېرته ستنېدونکو ماشومانو وضعیت “بحراني” بللی او د خوارځواکۍ، له زده‌کړې بې‌برخې پاتې کېدو، او فزیکي او رواني خطرونو د زیاتوالي په اړه خبرداری ورکړی.په داسې حال کې چې د کډوالو د بېرته ستنیدو لړۍ دوام لري، نړیوالې ادارې له نړیوالې ټولنې څخه د عاجلو اقداماتو غوښتنه کړې. د چارو د شنونکو په باور، د پولو په سیمو کې د لازم زیربناوو نشتون، د هېواد پراخه ناامني، او د امکاناتو کمښت، دا کړکېچ لا سخت کړی دی.