هدر بار: طالبان د ښځو د خپلواکۍ او آزادۍ د سیستماتیک له‌منځه وړو په موخه ښځې نیسي

هدر بار، د بشر د حقونو د څار سازمان د ښځو د څانګې مرستیالې، ویلي چې د طالبانو له لوري د ښځو نیول، د هغوی په وینا د “بد حجاب” له امله، نه یوازې فزیکي او رواني زورونه دي، بلکې دا یوه ستره تګلاره ده چې له مخې یې د ښځو شتون له ټولنې څخه ورو ورو پاکېږي او پرې بشپړه اطاعت تحمیلېږي.
نوموړې په خپله ایکس پاڼې کې لیکلي: «طالبان د حجاب له امله ښځې نیسي، فزیکي او رواني تاوتریخوالی پرې کوي او غواړي د ښځو خپلواکي په سیسټماټيک ډول له‌منځه یوسي او پر ځای یې اطاعت ځای خپل کړي.»
هدر بار وړاندې لیکلي:
«مهمه نه‌ده چې طالبان له کومو لارو یا وسایلو کار اخلي، موږ به بیا هم د خلاصون لاره ومومو.»
دا څرګندونې داسې مهال خپرېږي چې راپورونه ښيي طالبانو په تېرو اونیو کې یواځې د دې له امله ښځې نیولي، چې دوی داسې حجاب اغوستی و چې د طالبانو له نظره «د شریعت خلاف» بلل شوی.
یاد ګامونه د ښځو پر وړاندې د سیسټماټيک فشارونو د زیاتېدو اندېښنې راپورته کړې دي.
نړیوالو بشري سازمانونو څو څو ځله خبرداری ورکړی چې په افغانستان کې د ښځو پر ژوند، ښوونې او شخصي آزادیو سخت بندیزونه خطر لرونکي دي. د هدر بار تازه څرګندونې هم د همدې اندېښمن بهیر پر وړاندې د نړیوالو غبرګون یوه برخه ده.