د افغان ژورنالېستانو فدراسیون په جلا وطنۍ کې: طالبانو په یوه اوونۍ کې ۷ ژورنالېستان نیولي دي

د افغان ژورنالېستانو فدراسیون په جلاوطنۍ کې خبر ورکړی چې د تېرې یوې اوونۍ په ترڅ کې، د طالبانو د استخباراتو او د امر بالمعروف وزارت کارکوونکو له خوا، اووه تنه ژورنالېستان او رسنیز فعالان په کابل او یو ولایت کې نیول شوي دي.د دې بنسټ په خبرپاڼه کې ویل شوي، د زمري په ۲مه نېټه، طالبانو یو خبریال او دوه رسنیز فعالان د نجونو لپاره د روزنیز پروګرام د تنظیم له امله نیولي دي.دغه راز، تر دې یوه ورځ مخکې، یو بل خبریال د بهرنیو خبري ویب‌پاڼو سره د همکارۍ په تور نیول شوی دی.سرچینه زیاتوي چې د چنګاښ په ۲۴مه نېټه، د طالبانو استخباراتي او د امر بالمعروف ځواکونه د «پېکسل» په نوم د یوه رسنیز شرکت دفتر ته ورغلي او د دغه شرکت رییس نوید احمد اصغري او مرستیال یې مشتاق احمد حلیمي یې نیولي دي.د طالبانو د امر بالمعروف وزارت د زمري په ۴مه د نوید اصغري د اعتراف ویډیو خپره کړې چې په کې ادعا شوې نیول شوي کسان د لوېدیځو سریالونو د ژباړې له لارې له بهرنیو رسنیو سره همکاري درلوده او د بهرنۍ کلتور ترویج یې کاوه.د افغان خبریالانو فدراسیون په جلاوطنۍ کې دغه نیونې د وینا ازادۍ ښکاره سرغړونه بللې او له طالبانو یې غوښتي چې ټول نیول شوي خبریالان دې بې له قید او شرطه خوشې کړي.فدراسیون ټینګار کړی چې طالبان هڅه کوي د هېواد په ګڼو ولایتونو کې د خبریالانو او رسنیزو فعالانو د ځپلو له لارې د وینا ازادي غلې کړي.