د ایران په پلازمېنه او نورو سیمو کې د افغان کډوالو د وژنو لړۍ؛

د محمد رضايي جسد تر یوه پل لاندې وموندل شوپه ایران کې د افغان کډوالو د وژنو مرموزې او ویرونکې پېښې دوام لري. تازه، د محمد رضايي په نوم ۱۸ کلن افغان ځوان جسد د یوه پل لاندې موندل شوی دی.د راپورونو له مخې، د محمد رضايي کورنۍ د څو ورځو هڅو وروسته د هغه د وژل کېدو خبر ترلاسه کړ.تر دې پېښې وړاندې، د یوې افغان مېرمنې جسد چې له خپلو درې ماشومانو سره یوځای وژل شوې وه، د تهران د مرتضی‌ګرد په یوه کور کې موندل شوی و. دا مېرمن چې د تخار ولایت اوسېدونکې وه، د ناامنۍ له امله ایران ته کډه شوې وه، خو هلته په خورا ظالمانه ډول وژل شوې ده. د ماشومانو د وژنې طریقه خپکۍ ښودل شوې ده.همداراز، دوه نور افغان ځوانان بشیر او طاها هم وژل شوي دي. بشیر چې د کاناډا مېشتو کډوالو د یو کور ساتونکی و، د سر پر ګوزار وژل شوی، او طاها بیا په ډېر وحشیانه ډول د بدن غړي یې ټوټې ټوټې شوي دي. ویل کېږي چې د دغو وژنو عاملین ایرانی وګړي دي چې د نژادپرستانه انګیزو له امله دغه کارونه کړي دي، خو لا هم په تېښته دي.دا پېښې د افغان کډوالو ناوړه امنیتي وضعیت او د هغوی پر وړاندې د تاوتریخوالي دوام ښيي. د بشري حقونو فعالان د دغو پېښو د جدي څېړنې او عاملینو د محاکمه کېدو غوښتنه کوي، خو تر اوسه د ایران رسمي چارواکو کوم غبرګون نه دی ښودلی.