په غور کې د پخوانیو نظامیانو وژنې دوام؛ د ملي امنیت یو پخوانی افسر د طالبانو له‌خوا تر دویم ځل نیول وروسته وژل شوی دی

ځايي سرچینو د غور ولایت د الله‌یار ولسوالۍ کې راوي زن ته تأیید کړې چې د ملي امنیت پخوانی افسر ډګرمن محسن، له ایرانه تر شړل کېدو او بیا د طالبانو د استخباراتو له‌خوا تر بیا ځل نیول وروسته، په ډېر وحشت سره وژل شوی دی.سرچینې وايي، د هغه ټوټې شوی جسد کورنۍ ته سپارل شوی دی.د یوې عینې ښځینه شاهدې په وینا چې د امنیتي اندېښنو له امله یې نوم نه دی اخیستل شوی ډګرمن محسن د پخواني حکومت تر سقوط وروسته د وسلې د لرلو په تور شپږ میاشتې د طالبانو د استخباراتو تر بند لاندې و.وروسته له خلاصون، نوموړی د خپلې کورنۍ د امنیت لپاره ایران ته تللی و، خو له هغه ځایه تر شړل کېدو وروسته، یو ځل بیا طالبانو ونیوه او دا ځل یې ژوند له لاسه ورکړ.ډګرمن محسن د الله‌یار په نوی تاسیس شوې ولسوالۍ کې له خپلې مېرمن او دوو کوچنیو اولادونو سره اوسېده او په کرنیزو چارو بوخت و. سرچینې زیاتوي، چې له هغه سره یو نږدې خپلوان یې هم وژل شوی دی.دا پېښه داسې مهال شوې چې د طالبانو له واکمنېدو وروسته، سلګونه پخواني نظامیان د غور ولایت څخه ګاونډیو هېوادونو، په تېره بیا ایران ته تښتېدلي دي.له دې وړاندې هم د پخوانیو عسکرو او دولتي کارکوونکو د وژنې، لادرکه کېدو او نیونو راپورونه ورکړل شوي، چې د طالبانو د مشر له لوري د اعلان شوې “عمومي عفوې” پر نقض د خلکو اندېښنې زیاتې کړي دي.یاده ښځه شاهد وايي: «موږ ښځې د خپلو مېړونو، وروڼو او زامنو امنیت ته اندېښمنې یو. دلته هېڅوک خوندي نه دي، په ځانګړي ډول هغه کسان چې پخوا د حکومت لپاره کار کړی و.»د هېواد له نورو ولایتونو هم ورته راپورونه ورکړل شوي، چې ښيي د پخوانیو سرتېرو نیونې او وژنې په تازه ورځو کې زیاتې شوې دي.دا لړۍ د افغانستان د بشري حقونو وضعیت ته په ملي او نړیوالو کچو ژورې اندېښنې پیدا کړي دي.