جبري کډه‌ کول په بامیانو کې؛ طالبانو د یوې هزاره مېشتې سیمې اوسېدونکي غرونو ته شړلي دي

د افغانستان په مرکزي سیمو کې د جبري کډو د دوام په ترڅ کې، طالبانو یو ځل بیا د یوې اصلي مېشتې سیمې خلک له خپلو کورونو ایستلي او غرونو ته‌ یې اړ کړي دي.سرچینې راوي زن ته وایي چې دا ځل د بامیان د طالبانو والي، عبدالله سرحدي، د امر له مخې د پنجاب ولسوالۍ د رشک غرغری نومي کلي ټول اوسېدونکي له خپلو کورونو شړل شوي دي.د سیمه‌ ییزو خلکو په وینا، د سه‌شنبې په ورځ (۷ د زمري) له غرمې وروسته، طالبانو د یادې هزاره مېشتې سیمې ټول اوسېدونکي له کورونو ایستلي، دروازې یې قفل کړې او خلک‌ یې غرونو ته‌ تښتېدلو ته اړ کړي دي.باقر کربلایي، د کلي یو مشر، وایي: «موږ تر سلو کلونو زیات دلته ژوند کړی، او زموږ ځمکې د بامیان د املاکو په اداره کې ثبت دي.»هغه زیاتوي، په ۱۴۰۱ هجري لمریز کال کې، دوه کوچي کسان، اول‌ ګل او قاسم وردک، د پنجاب ولسوالۍ د ځینو چارواکو او د والي په ملاتړ، د رشک پر ځمکو د ملکیت دعوا وکړه. دا دعوا د خلکو له مخالفت سره مخ شوه، خو بالاخره طالبانو پرته له کوم قانوني حکم، د زور له لارې ۲۵ کورنۍ له خپلو کورونو ایستلې.اوس مهال سلګونه خلک، چې ماشومان، ښځې او زاړه هم پکې شامل دي، په ډېرو سختو شرایطو کې غرونو ته کډه شوي دي.باقر کربلایي وایي چې دوی څو ځله د پنجاب ولسوالۍ او د بامیان ولایت لومړنیو محکمو ته مراجعه کړې، خو هېڅ چارواکي د دوی شکایتونو ته پاملرنه نه ده کړې.دی زیاتوي: «زموږ زرګونه جریبه ځمکه او مالونه د کوچیانو له‌خوا غصب شوي، پرته له دې چې موږ ته د دفاع زمینه برابر شي.»د سیمې یو شمېر نور اوسېدونکي له رسنیو سره په تماس کې د لومړنیو امکاناتو، په ځانګړي ډول د څښاک اوبو او خوړو له کمښت څخه شکایت لري او له خیریه مؤسسو څخه د بیړنۍ مرستې غوښتنه کوي.دوی د طالبانو دا عمل د افغانستان د مرکزي سیمو د قومي جوړښت د بدلون هڅه بولي، او له نړیوالو بنسټونو غواړي چې دې موضوع ته جدي پاملرنه وکړي.یاده دې وي چې تېرې اوونۍ هم طالبانو د غور ولایت د دولت‌ یار ولسوالۍ د شپږو کلیو اوسېدونکي په ورته ډول له خپلو کورونو شړلي وو او جبري کډو ته‌ یې اړ کړي وو.