له ایران څخه د کډوالو پراخ ایستل؛ په درې میاشتو کې نږدې دوه میلیونه افغانان ایستل شوي

د طالبانو د کډوالو او بېرته راستنېدونکو چارو وزارت اعلان کړی چې یوازې په تېر دریو میاشتو کې، نږدې ۱.۸ میلیونه افغانان د ایران له‌خوا په جبري ډول شړل شوي دي.د دغه وزارت د مسلکي چارو مرستیال عبدالرحمان راشد د زمري میاشتې په ۸مه (چهارشنبه) په یوه خبري ناسته کې وویل چې روان کال کې تر دې دمه له پاکستانه تر ۱۸۴ زرو ډېر او له ترکیې شاوخوا ۵ زره افغانان بېرته افغانستان ته را استول شوي دي.نوموړي زیاته کړه چې ټول راستنېدونکي ثبت شوي، او د هغوی د لومړنیو اړتیاوو لپاره، لکه خوراکي توکو او بنسټیزو امکاناتو، مرستې برابرې شوې دي.همداراز راشد وویل چې د طالبانو د مشر د لارښوونې له مخې، تر اوسه ۳۸ ښارګوټي په ۲۹ ولایتونو کې د دغو راستنېدونکو د استوګنې لپاره په پام کې نیول شوي دي.خو له دې سره سره، د سرپناه نشتوالی او د کاري فرصتونو کمښت، د زرګونو راستنېدونکو ژوند له جدي ستونزو سره مخ کړی دی.له بله پلوه، له ایرانه د کډوالو شړل لا هم دوام لري. د ایران چارواکو اعلان کړی چې تر دې دمه لږ تر لږه یوه میلیون افغان کډوال چې د قانوني اسنادو پرته وو، له هغه هېواده ایستل شوي دي.ایراني چارواکو له ټولو هغو افغان کډوالو څخه چې قانوني اسناد نه‌لري، غوښتي چې ایران پرېږدي. د کډوالو د شمېر په اړه مختلف اټکلونه شته: ځینې سرچینې دا شمېر تر څلور میلیونه رسوي، خو یو شمېر ایراني چارواکي دا شمېر شاوخوا دوه میلیونه ښيي.له دې سره هم‌مهاله، په پاکستان کې هم میلیونونه افغان کډوال ژوند کوي. راپورونه ښيي چې د شاوخوا یوه میلیون کسانو د اقامت کارتونو موده پای ته رسېدلې، خو تر اوسه د پاکستان حکومت د دې کارتونو د تمدید یا نه‌تمدید په اړه کومه پرېکړه نه‌ده کړې.