یوناما: په ۲۰۲۵ کال کې تر ۱.۳ میلیونه زیات افغانان هېواد ته ستانه شوي دي

د افغانستان لپاره د ملګرو ملتونو د مرستندوی دفترونه (یوناما) اعلان کړی چې یوازې په ۲۰۲۵ میلادي کال کې له ۱.۳ میلیونه زیات کډوال بېرته افغانستان ته ستانه شوي دي. دغه پراخ بهیر د هېواد پر کورنیو ټولنو سخت فشار راوړی، په ځانګړې توګه په داسې حال کې چې د افغانستان له ۷۰ سلنه زیات خلک د بیوزلي تر کرښې لاندې ژوند کوي او مالي سرچینې ډېرې محدودې دي.یوناما د دوستۍ نړیوالې ورځې په مناسبت په خپره کړې خبرپاڼه کې ویلي، سره له دې ننګونو، د ملګرو ملتونو ادارو، محلي بنسټونو او خلکو د پراخې همکارۍ له لارې هڅې روانې دي، څو بېرته ستنېدونکي له رارسېدو څخه تر ټولنیز ادغام پوره ملاتړ ترلاسه کړي. دغه دفتر دا هڅې د “همدردۍ، انسانیت او ریښتینې دوستۍ” څرګندونه بللې ده.په وروستیو کلونو کې افغانستان ته د کډوالو د ستنېدو بهیر چټک شوی، په ځانګړي ډول له پاکستان، ایران او ترکیې څخه، چې دا ستنېدنه ځینې وختونه جبري او ځینې وختونه پخپله خوښه ده. دا په داسې حال کې ده چې هېواد له بشري، اقتصادي او امنیتي کړکیچونو سره مخ دی. مرستندویې ادارې، په تېره بیا ملګري ملتونه، څو څو ځله خبرداری ورکړی چې د کافي سرچینو، اساسي خدماتو، کور، ښوونې او روغتیايي پاملرنې نشتوالی د بېرته ستنېدونکو د ټولنیز ادغام بهیر له سختو ستونزو سره مخ کړی دی.خو د خلکو پر بنسټ نوښتونه او ولسي ملاتړونه په ځینو ولایتونو کې د فشارونو په کمولو او د ستنېدو د بهیر په اسانولو کې مهم رول لوبولی دی.یوناما له ټولو نړیوالو بنسټونو او پرمختیايي شریکانو غوښتنه کړې چې د بېرته ستنېدونکو د عاجلو اړتیاوو د پوره کولو او د کوربه ټولنو د ظرفیتونو د پیاوړتیا لپاره لا زیاتې سرچینې برابرې کړي.