د افغانستان د رسنیو د ملاتړ ادارې: د خبریالانو نیول او ګواښل د وینا له آزادۍ ښکاره سرغړونه ده

د افغانستان د رسنیو د ملاتړ اداره (AMSO) په یوه خبرپاڼه کې د خبریالانو، رسنیو او رسنیزو فعالانو پر وړاندې د وروستیو نیونو، ګواښونو او بندیزونو ژوره اندېښنه څرګنده کړې ده.یادې ادارې ویلي، دا ډول چلندونه د وينا د آزادۍ او د معلوماتو د لاسرسي له بنسټیزو بشري حقونو او نړیوالو تعهداتو سره په ښکاره تضاد کې دي. په اعلامیه کې ټینګار شوی، چې خبریالان باید د خپلو مسلکي دندو له امله ونه ګواښل شي، نه دې سانسور شي او نه دې ونیول شي.AMSO د نوراحمد امغری او مشاق احمد جلیلي په ګډون د یو شمېر خبریالانو د نیولو راپورونو ته په اشارې ویلي، چې یاد کسان د بهرنیو سریالونو د ژباړې او دوبلې په تور نیول شوي، خو د هغوی د وضعیت په اړه کوم رسمي معلومات نشته.یادې ادارې د کابل، لوګر او خوست په ګډون په یو شمېر ولایتونو کې د خبریالانو د ګواښ له امله هم اندېښنه ښودلې او د هېواد د رسنیز وضعیت جریان یې سخت بللی دی.په اعلامیه کې دا هم راغلي چې د ژوندي موجوداتو د عکسونو د اخیستلو او خپرولو تازه بندیز د مطبوعاتو د آزادۍ خلاف عمل دی او دا یوه بله بېلګه ده چې ښيي رسنۍ لا زیاتې محدودېږي.د افغانستان د رسنیو د ملاتړ اداره له اوسنیو واکمنو غوښتي چې نیول شوي خبریالان بې له قید او شرطه ژر تر ژره خوشې کړي، د خبریالانو د خوندي او خپلواکه فعالیت زمینه برابره کړي او روان فشارونه او بندیزونه پای ته ورسوي.دا اداره وایي، دوی به د وینا له آزادۍ، د خبریالانو له خوندیتوب او د هغوی له مسلکي فعالیتونو ملاتړ ته دوام ورکړي.