یونیسف: په بامیان کې پاکو اوبو ته لاسرسی د ماشومانو د زده‌کړې زمینه برابره کړې

د ملګرو ملتونو د ماشومانو ملاتړ صندوق (یونیسف) ویلي، چې د بامیان ولایت د قافله‌باشي کلي د څښاک پاکو اوبو پروژه د ماشومانو، په ځانګړي ډول نجونو، د زده‌کړې په برخه کې د پام وړ مثبت بدلون راوستی دی.یونیسف دغه راپور نن پنج‌شنبه، د زمري ۹مه خپور کړی او ویلي یې دي چې پروژه کې د اوبو سرچينو او د کورونو لپاره د نلونو لګول شامل دي. په لومړیو کې ۱۳۰ کورنۍ له دې سیستم څخه برخمنې وې، خو اوس دا شمېر ۴۰۸ کورنیو ته رسېدلی، چې د لومړني ظرفیت درې برابره دی.یونیسف ویلي، له دې پروژې وروسته ماشومان نور اړ نه‌دي چې هره ورځ کیلومترونه لاره د اوبو راوړلو لپاره ووهې.د قافله‌باشي د ابتدایي ښوونځی مدیر، طاهر محمدي، ویلي، چې د زده‌کوونکو د حاضرۍ کچه ۹۸ سلنې ته لوړه شوې او له ککړو اوبو رامنځته کېدونکي ناروغۍ هم په محسوس ډول راکښته شوې دي.افغانستان د سیمې له وچو هېوادونو څخه ګڼل کېږي، چې تر ۷۰ سلنه زیات خلک یې په کلیوالو سیمو کې ژوند کوي. په دغو سیمو کې د پاکو اوبو کمښت نه یوازې د کورنیو روغتیا ته خطر پېښوي، بلکې د ماشومانو، په ځانګړې توګه د نجونو، د زده‌کړې پر وړاندې ستر خنډ هم بلل کېږي.