په غور کې د درې اولادونو مور فاطمه د کورني تاوتریخوالي له امله ځان وژنه کړې

په غور ولایت کې سیمه‌ییزې سرچینې وایي چې یوه ځوانه مېرمن د لعل او سرجنګل په ولسوالۍ کې د کورني تاوتریخوالي له امله ځان وژنه کړې ده.د کشک سفلا کلي د پراختیایي شورا غړې، مېرمن گلثوم، راوي زن ته ویلي چې فاطمه، ۳۳ کلنه ښځه او د درې ماشومانو مور، د پنج‌شنبې په ورځ (۹ د زمري) له غرمې وړاندې ځان په دار کړی او خپل ژوند ته یې د پای ټکی ایښی دی.د گلثوم په وینا، فاطمه له ډېرې مودې راهیسې د ژوند له حالته شکایت درلود، که څه هم د رواني ناروغۍ ښکاره نښې یې نه لرلې. نوموړې زیاتوي چې د فاطمې ځان وژنې د کلي ښځې سختې غمجنې او حیرانې کړې دي.دغه د پراختيايي شورا غړۍ دا هم تایید کړې  چې د فاطمې مېړه، غلام‌حیدر، د مقتولې د ورور په شکایت طالبانو نیولی او د لعل ولسوالۍ مرکز ته‌ یې لېږدولی دی.گلثوم دعوه کوي چې فاطمه د خپل مېړه له دوامدار زور زیاتي سره مخ وه، او کورنۍ یې تېر میاشت د طالبانو د امر بالمعروف ادارې ته شکایت کړی و، خو دغه اداره هېڅ ډول رسېدنه نه ده کړې.دا پېښه په داسې حال کې ده چې تېر کال هم، عابده نومې یوه نجلۍ د تیوره ولسوالۍ کې له هغه وروسته ځان وسوځاوه چې د طالبانو د لومړني محکمه پرېکړه‌ یې واورېده او هغې ته‌ یې له یوه زوړ سړي سره د جبري واده حکم ورکړ.د عابدې نیم‌سوځېدلي جسد انځورونه چې په رسنیو او ټولنیزو شبکو خپاره شول، د بشري حقونو بنسټونو او د ښځو د حقونو د ملاتړو سخت غبرګونونه راوپارول، او له نړیوالې ټولنې یې وغوښتل چې د افغان ښځو وضعیت ته جدي پاملرنه وکړي.په ورته حال کې، یوشمېر ښځینه فعاله افغانانې په غور کې وایي چې د طالبانو ښځه‌ ضد چلند او د ښځو سیسټماتیک زورزیاتی د ښځو پر وړاندې د تاوتریخوالي د زیاتوالي اصلي عوامل دي. دوی د طالبانو له محاکمو نه د ښځو اړوندو قضیو له نادودې سختې نیوکې کړي او د عدالت او بېړنۍ رسېدنې غوښتنه کوي.