د خوړو نړیوال پروګرام ۵۳۹ میلیونه ډالرو بېړنۍ مرستې غوښتې شوې

د ملګرو ملتونو د خوړو نړیوال پروګرام (WFP) وايي، چې د راتلونکو شپږو میاشتو لپاره یې په افغانستان کې د اړمنو کسانو د مرستې لپاره ۵۳۹ میلیونه ډالره بودجې ته بېړنۍ اړتیا لري.یاد پروګرام نن یکشنبه (د زمري ۱۲مه) په خپل پیغام کې، چې په ایکس ټولنیزه شبکه کې خپور شوی، خبرداری ورکړی چې د لوږې کړکیچ ورځ تر بلې خرابېږي او میلیونونه افغانان بېړنیو بشري مرستو ته اړتیا لري.د خوړو د نړیوال پروګرام د معلوماتو له مخې، تر ټولو زیات زیان ښځو، ماشومانو او هغو راستنېدونکو کډوالو ته رسېدلی، چې تازه له ګاونډیو هېوادونو بېرته افغانستان ته ستانه شوي دي. دې ادارې مخکې هم ویلي وو، چې نږدې لس میلیونه افغانان به سږ اوړي له سختې خوړو نشتون سره مخ وي.برسېره پر دې، د نړیوالو مرستو کمېدل او له ګاونډیو، په ځانګړي ډول له ایران څخه د افغان کډوالو پراخ راستنیدل، بشري وضعیت نور هم کړکېچن کړی. د طالبانو د شمیرو له مخې، په تېرو دریو میاشتو کې له ایران څخه تر یو میلیون او ۸۰۰ زرو ډېر کسان افغانستان ته راستانه شوي دي.په افغانستان کې د ملګرو ملتونو استازولۍ (یوناما) هم خبرداری ورکړی، چې که د کډوالو د ایستلو لړۍ همداسې دوام ومومي، نو افغانستان به له یوې نوې بېړنۍ انساني کړکېچ سره مخ شي.نړیوالې مرستندویه ادارې وايي، که اړتیا وړ مالي سرچینې برابرې نه شي، نو دوی به د افغانانو بېړنیو اړتیاوو ته د رسیدو توان ونه لري.