طالبانو په کاپيسا کې یو تن ددې ډلې پر ضد د تبلیغ په تور په دورې وهلی

د طالبانو سترې محکمې اعلان کړی، چې په کاپيسا ولایت کې یو تن د دې ډلې پر ضد د تبلیغ په تور د ۳۹ دورو تر څنګ، یو کال او شپږ میاشتې تنفیذي بند ته محکوم شوی دی.دا حکم د یکشنبې په ورځ (د زمري ۱۲مه / د اګست ۳مه) د طالبانو د عدلي سیستم له‌خوا صادر او اعلان شوی دی. د سترې محکمې په اعلامیه کې راغلي، چې دا حکم د کاپيسا د ابتدائیه محکمې له‌خوا صادر شوی و.د یاد تورن کس د هویت او د هغه د تبلیغ ډول په اړه نور جزئیات نه دي ورکړل شوي.په وروستیو کلونو کې طالبانو په ځلونو هغه کسان نیولي، چې د دوی پر واکمنۍ یې نیوکې کړې وې، په ځانګړي ډول خبریالان، د ټولنیزو رسنیو کاروونکي، او مدني فعالان.د عام محضر دورې، د طالبانو د عدلي نظام یوه برخه بلل کېږي، چې د دوی د سخت‌ دریځې تفسیر له مخې د اسلامي شریعت پر بنسټ عملي کېږي.له هغه وخته چې طالبانو په ۱۴۰۰ لمریز کال کې یو ځل بیا پر افغانستان واک ترلاسه کړی، د مخالفو غږونو پر وړاندې د دوی چلند خورا سخت شوی دی.د بشري حقونو مدافع سازمانونه له وینا د آزادۍ پر ضد د بندیزونو، د خپل‌ سري نيولو او فزیکي سزاوو د زیاتوالي په اړه ژوره اندېښنه ښيي، خو طالب چارواکي دا ډول مجازات د خپل حکومت د “عدالت تأمین” برخه بولي.