د ایران یو چارواکی: ایران په څلورو میاشتو کې له دوغارون پوله څخه له ۷۹۰ زرو ډېر افغان کډوال ایستلي دي

د ایران چارواکي وايي، له افغانستانه د کډوالو د شړلو بهیر چټک شوی دی. جعفر سیدآبادي، چې د ایران د خراسان رضوي ولایت د بهرنیو اتباعو او کډوالو ادارې مشر دی، وایي چې یوازې د روان لمریز کال له پیله تر د اسد میاشتې یوولسمې نېټې پورې، له ۷۹۰ زرو ډېر افغان کډوال د دوغارون له پوله ایستل شوي دي.نوموړي، چې د زمري په ۱۲مه (يکشنبه) ورځ یې د دوغارون پوله لیدلې، وویل: «د تېرو څلورو لسیزو په اوږدو کې، د ایران دولت او ولس د کډوالو په برخه کې د خپل ګاونډیتوب مسؤلیت ادا کړی او تل د افغانستان د خلکو تر څنګ ولاړ دي.»سیدآبادي زیاته کړه چې د ایران اسلامي جمهوریت یوازې هغو کډوالو ته د خدماتو وړاندیز کوي چې د قانوني لارو له لارې هیواد ته داخل شوي وي.نوموړي د بې‌ سند کډوالو د ایستلو بهیر ته په اشارې سره له نړیوالو بنسټونو وغوښتل چې په دې برخه کې بې‌پروا پاتې نه شي. د ده په وینا، ایران د اقتصادي ستونزو سره سره، کډوالو ته پراخ خدمات وړاندې کړي، او اوس د نړیوالې ټولنې وار دی چې خپل مسؤلیت ادا کړي.سیدآبادي وویل، له ایران او اسراییلو تر منځ د دولس ورځني جګړې تر پای ته رسېدو وروسته، له افغانستانه د ناقانونه کډوالو شړل نورهم زیات شوي دي.په همدې حال کې، نوموړي وویل چې د طالبانو د هرات والي وروستي سفر خراسان رضوي ولایت ته، د دواړو لوریو تر منځ په اقتصادي او پانګوالو چارو کې د څو ګډو تفاهم لیکونو د لاسلیک سبب شوی. دی باور لري چې دا تړونونه به د دواړو هیوادونو د پولو په اوږدو کې د دوامدارو کارونو زمینه برابره کړي.خو له دې سره سره، یو شمېر له ایرانه شړل شوي افغان کډوال رسنیو ته ویلي، چې د نیول کېدو او جبري ایستلو پر مهال د ایرانیو سرتېرو له خوا له تاوتریخوالي، ناوړه چلند، د مالونو ضبط، او سپک چلند سره مخ شوي دي؛ هغه تورونه چې د بشري حقونو بنسټونو هم وار له مخې مطرح کړي، خو د ایران چارواکو تل رد کړي دي.