په هرات کې ۵۲ ښځینه سرپرسته کورنۍ د نغدي مرستو څخه برخمنې شوې

د ښځو د ټولنیزو خدمتونو او فعالیتونو انجمن «واسا» په یوه خپره شوې خبرپاڼه کې اعلان کړی چې په هرات کې ۵۲ ښځینه سرپرستې کورنۍ د نغدي مرستو مستحقې پېژندل شوې او مرسته ورسره شوې ده.دغه مرستې د ملګرو ملتونو د ښځو څانګې په همکارۍ د هرات د انجیل ولسوالۍ کې، د ښځو د لومړنیو اړتیاوو د پوره کولو په موخه وېشل شوې دي.د خبرپاڼې له مخې، هرې یوې مېرمنې ته ۷۵ امریکایي ډالر (چې شاوخوا ۵،۱۶۳ افغانۍ کېږي) ورکړل شوي دي. د دې نغدي مرستو موخه د ښځو اقتصادي پیاوړتیا، د کورنیو د مالي فشارونو کمول، او په ټولنه کې د ښځو رغنده رول ته وده ورکول ښودل شوې ده.دا مرستې داسې مهال ترسره کېږي چې د ملګرو ملتونو د خوړو نړیوال پروګرام (WFP) په وینا، ښځې او نجونې له روان بشري بحران او لوږې تر ټولو زیاتې زیانمنې شوي دي.یاد پروګرام څو ځله خبرداری ورکړی چې د طالبانو د بندیزونو له امله ښځینه سرپرستې د دې جوګه نه دي چې د خپلو کورنیو لګښتونه برابر کړي.همداراز، د بشري حقونو ځینې فعالان وایي، له ایرانه د کډوالو په ځانګړي ډول د ښځو د شړلو دوام، د بېوزلو او لوږې بحران لا زیات کړی، چې ښځو ته یې دروند اغېز اړولی دی.