د خبریالانو نړیوال فدراسیون: په افغانستان کې د رسنیو ازادي تر ټولو ټیټې کچې ته رسېدلې ده

د نړیوالو خبریالانو فدراسیون (IFJ) په خپل تازه راپور کې ویلي چې په افغانستان کې د رسنیو ازادي له جدي ګواښ سره مخ ده، او د طالبانو له خوا پر خپلواکو رسنیو فشارونه او زورزیاتی لامله د رسنیو ازادي تر ټولو ټیټې کچې ته رسېدلې ده.دغه سازمان د ۲۰۲۵ کال د جولای میاشتې د ثبت شوو معلوماتو پر بنسټ وايي چې لږ تر لږه اووه تنه د رسنیو فعالان د افغانستان په بېلابېلو ولایتونو کې د طالبانو له خوا نیول شوي دي. د فدراسیون په وینا، دا کار د خپلواکو رسنیو د غږونو د خاموشولو لپاره منظمه تګلاره ده.په تازه پېښه کې، ابوذر سرپولي، د «توانا» خبري آژانس مشر او د افغانستان د رسنیو د مؤسسې مشر، له خپلو دوو همکارانو سره د طالبانو د امر بالمعروف ادارې له خوا د جولای په ۲۴ مه نیول شوی دی.طالبانو دغه کسان په بهرنیو بنسټونو سره د همکارۍ او منتقدانه مطالبو خپرولو تورن کړي دي.راپورونه وایي چې د سرپولي یوه ویدیو چې ښايي تر فشار لاندې اخیستل شوې وي خپره شوې؛ خو د نړیوالو خبریالانو فدراسیون دغه کار د عدلي اصولو خلاف ګڼي او د نیول شویو کسانو د ژر خوشې کولو غوښتنه کوي.له بلې خوا، د جولای په ۱۵ مه، احمد نوید اصغري، د «پیکسل» رسنیز شرکت مدیر، له خپل مرستیال سره نیول شوی و. طالبان ادعا کوي چې دوی د یو “غیراسلامي” تلویزیوني سریال په جوړولو کې لاس درلود. که څه هم دا دواړه کسان وروسته له دوه اونیو خوشې شول، خو له خوشې کېدو مخکې یې د اعتراف ویډیو ثبت شوې وه.په کابل او نورو ولایتونو کې هم ورته پېښې شوي دي، لکه د یوه رسنۍ کارکوونکی نیول چې ګواکې له بهرنیو رسنیو سره یې همکاري کوله، او د یو محلي خبریال توقیف چې د طالبانو د رسمي روایت سره متفاوته راپورونه یې خپرول.د جولای په پای کې درې نور خبریالان چې د روان کال له جنورۍ میاشتې راهیسې په بند کې وو، خوشې شول.د نړیوالو خبریالانو فدراسیون او د افغانستان د خپلواکو خبریالانو ټولنه د دغو پېښو په اړه اندېښنه ښودلې او له طالبانو یې غوښتي چې په خپل سر نیولو او پر رسنیو د فشارونو مخه ونیسي.