په یوه ورځ کې له ۱۱۷۰ ډېرو افغان کډوالې کورنۍ هېواد ته راستنې شوې

تېره ورځ ۱۱۷۴ افغان کډوالې کورنۍ د ګاونډیو هېوادونو څخه د بېلابېلو پولو له لارې افغانستان ته راستنې شوې دي.د باختر دولتي خبري آژانس د راپور له مخې، چې د طالبانو تر کنټرول لاندې فعالیت کوي، دا کورنۍ په لاندې ډول بېرته هېواد ته دننه شوي دي:– ۷۴ کورنۍ د ننګرهار له تورخم لارې،– ۴۸ کورنۍ د کندهار له سپین‌بولډک لارې،– ۲۲۱ کورنۍ د نیمروز له ابریشم پله لارې،– او ۸۳۱ کورنۍ د هرات له اسلام‌قلعه لارې.طالب چارواکي وايي، دغه کورنۍ د هېواد ته د دننه کیدو سره د اړوندو ادارو له‌خوا هرکلی شوی او له هغوی سره لومړنۍ مرستې او لازمې مشورې شریکې شوې دي.دا په داسې حال کې ده چې د ملګرو ملتونو سازمان څو ځل د افغان کډوالو د وضعیت په اړه په ګاونډیو هېوادونو کې اندېښنه ښودلې.په ځانګړي ډول، له هغې وروسته چې په ایران او پاکستان کې د افغان کډوالو پر وړاندې فشارونه او بندیزونه زیات شوي، د ملګرو ملتونو د کډوالو عالي کمېشنرۍ (UNHCR) له یادو هېوادونو غوښتي چې له کډوالو سره بشردوستانه چلند تضمین کړي او له جبري ایستلو لاس واخلي.په افغانستان کې د ملګرو ملتونو استازولۍ ټینګار کړی چې راستانه شوي کسان عاجلو مرستو ته اړتیا لري، په ځانګړي ډول د سرپناه، روغتیايي خدماتو، ښوونېز او معیشتي امکاناتو په برخو کې. دا بنسټ له نړیوالې ټولنې غوښتي چې د دغو کډوالو د بیا ادغام او ملاتړ لپاره زیاتې مرستې برابرې کړي.دا په داسې حال کې ده چې په وروستیو میاشتو کې د افغان کډوالو د بېرته راستنېدو لړۍ زور اخیستی او د دغو کورنیو لپاره د بیا ځای پر ځای کېدو امکاناتو ته اندېښنې هم زیاتې شوې دي.