د طالبانو د دښمني له کلمو سره؛ په هرات کې یې د «فهیم سوپرمارکېټ» له نومه د «سوپر» کلمه لرې کړې ده

په هرات ولایت کې یو شمېر خلکو راوي زن رسنۍ ته ویلي چې طالبانو د «فهیم سوپر مارکېټ» له نومه د «سوپر» کلمه لرې کړې او دا برخه یې د تور رنګ په کارولو پټه کړې ده.د سرچینو په وینا، طالبانو دا کلمه ځکه له منځه وړې چې ګواکې «سوپر» د خلکو په ذهن کې منفي یا جنسي تعبیر پیدا کوي. هغوی د دوکان خاوند ته امر کړی چې د مارکېټ لوحه بدله کړي.همداراز راپورونه شته چې طالبانو د امر بالمعروف او د ښاروالۍ ادارې تر چتر لاندې د ولایت په مشرۍ یوه کمیټه جوړه کړې، تر څو د خلکو د دوکانونو او عامه ځایونو نومونه، چې د دوی له خوښې سره سم نه وي، وڅېړي او لرې یې کړي.سرچینې زیاتوي چې طالبان هڅه کوي ترڅو له خپلې افراطي عقیدې سره سم نه یوازې نومونه بدل کړي، بلکې د ژبني تعصبونو په پارولو سره د قومونو تر منځ کرکه هم زیاته کړي، په ځانګړې توګه په هرات کې.په هرات کې د طالبانو د بیا واکمنۍ په لومړیو ورځو کې، دوی د دې ولایت د یوه مشهور ځای «باغ آزادي » نوم «باغ اسلامي» ته واړاوه.د هرات ګڼ شمېر اوسېدونکو په ټولنیزو شبکو کې د دې ګام په تړاو په ملنډو لیکلي چې «باغ آزادی» له طالبانو سره له لیدو وروسته مسلمان شوی او اوس به یې د «باغ اسلام» په نوم یادېږي.یادونه باید وشي چې څو ورځې وړاندې هم د دې ولایت ښاروالۍ د «شهید احمد شاه مسعود» او «شهید صادق» نوم لرونکي بلوارونه لرې کړي، او د هغوی نومونه یې په ترتیب سره «امام ابو حنیفه» او «امام بخاري» ته اړولي دي.د هرات یو شمېر فرهنګي او تاریخي شنونکي باور لري چې د طالبانو دا غیر منطقي ګامونه د نومونو په بدلولو او د کلمو په حذف سره، کولای شي د وخت په تېرېدو د هرات فرهنګي جوړښت او تاریخي هویت ته زیان ورسوي.