طالبانو لس تنه په کابل او میدان وردکو کې د خلکو په وړاندي په دورې وهلي دي

په تازه ګام کې، طالبانو لس کسان د کابل او میدان وردګو ولایتونو کې د بېلابېلو جرمونو په تور د عامو خلکو په حضور کې په دورو وهلي دي. د طالبانو د سترې محکمې له‌خوا د سه‌شنبې په ورځ، د زمري میاشتې ۱۴مه خپره شوې اعلامیه کې ویل شوي چې نهه تنه د کابل ښار اوسېدونکي د نشه‌يي توکو، په ځانګړي ډول د روان‌ګرځولو تابلیتونو او چرسو د پلورلو په تور نیول شوي او د خلکو په وړاندې په دورو وهل شوي دي.محکمې ویلي چې هر یو تن ته تر ۱۰ تر ۲۰ پورې دورو سزا ورکړل شوې او برسېره پر دې، هغوی د یو کال تر یو نیم کال پورې بند ته هم محکوم شوي دي.همداراز، په یوه بله جلا اعلامیه کې ویل شوي چې یو بل کس د میدان وردګو ولایت د دایمیرداد ولسوالۍ کې د غلا په تور د عامو خلکو په وړاندې په دورو وهل شوی دی.د ورکړل شوو معلوماتو له مخې، دغه کس د محل د لومړنۍ محکمې له‌خوا د ۳۹ دورو سزا اخیستې ده.طالبانو له هغه وخت راهیسې چې په ۱۴۰۰ لمریز کال کې بیا واک ته رسېدلي، څو څو ځله یې د بېلابېلو جرمونو په تور نیول شوي کسان د عامو خلکو په وړاندې مجازات کړي دي.تر څنګ د درو وهلو، داسې راپورونه هم خپاره شوي چې د اعدام سزاوې هم د خلکو په وړاندې عملي شوې دي؛ هغه ګامونه چې د بشري حقونو نړیوالو سازمانونو سختې اندېښنې راپارولي دي.دې سازمانونو په وار وار سره په خپلو اعلامیو کې د عامو خلکو په وړاندې مجازات، په ځانګړي ډول د بدن فزیکي سزاوې او اعدامونه، د بشري حقونو ښکاره سرغړونه بللي او د هغوی د سمدستي بندېدو غوښتنه یې کړې ده.