ملګري ملتونه: د افغان کډوالو بېرته ستنېدنه باید داوطلبي، خوندي او له درناوي ډکه وي

د افغان کډوالو د ایستلو د نوې پړاو له پیل وروسته، د ملګرو ملتونو د کډوالو عالي کمېشنرۍ د پاکستان له‌خوا د “پی‌او‌آر” کارت لرونکو افغان کډوالو د بېرته ستنولو په پرېکړه ژوره اندېښنه څرګنده کړې ده.دا نړیوال بنسټ په یوه اعلامیه کې ویلي چې هغه کډوال چې د کلونو راهیسې په قانوني اسنادو سره په پاکستان کې ژوند کوي، باید له جبري ایستلو څخه معاف پاتي شي. کمېشنرۍ ټینګار کړی چې د ثبت شوو کډوالو جبري ایستل، نه یوازې د منل شوو بشري اصولو خلاف دي، بلکې د پاکستان له اوږدمهاله کډوال‌پالنې سیاست سره هم په ټکر کې دي.ملګرو ملتونو په ځانګړي ډول د هغو ښځو او نجونو په اړه اندېښنه ښودلې چې ښایي بېرته هغو شرایطو ته اړې شي، چیرې چې د دوی اساسي حقونه له ګواښ سره مخ دي.په اعلامیه کې راغلي: «پاکستاني چارواکي باید تضمین ورکړي چې د افغان کډوالو ستنېدنه یواځې هغه وخت ترسره شي چې داوطلبي، خوندي او له درناوي ډکه وي.»دا ادارې د موقتي استوګنې د کارتونو د اعتبار د غځولو هرکلی هم کړی او له پاکستاني حکومت یې غوښتي چې هغه کسان چې نړیوالې ساتنې ته اړتیا لري، له جبري ایستلو څخه مستثنا کړي.ملګري ملتونه زیاتوي چې باید هغو افغانانو ته چې په پاکستان کې تر درملنې لاندې دي، زده‌کوونکي دي، یا له پاکستاني اتباعو سره یې واده کړی، د پاتې کېدو اجازه ورکړل شي.پاکستاني چارواکو منلې چې د “ناقانونه کډوالو د بېرته ستنولو پلان” له مخې، د کډوالي کارت لرونکي هم د ایستلو په پروسه کې شامل دي.په ورته وخت کې، د ملګرو ملتونو کمېشنرۍ راپور ورکړی چې په تېرو ورځو کې ګڼ افغان کډوال نیول شوي، چې ځینې یې د قانوني اسنادو لرونکي وو.ملګري ملتونه خبرداری ورکړی چې پراخه او بې‌ برخليکه ستنېدنه، کولی شي په افغانستان کې د بشري ناورین کچه نوره هم لوړه کړي او په سیمه کې د ټولنیز او اقتصادي ثبات لپاره خطر پېښ کړي.د دې ادارې په وینا، روان کال کې تر اوسه له دوو میلیونو زیات کسان بېرته افغانستان ته ستانه شوي، چې زیاتره یې د ایران له‌خوا ایستل شوي دي.