د ښځو د هیلو کړکۍ غورځنګ: د افغان ښځینه کډوالو ایستل له جنسیتي توپیر (آپارتاید) سره ښکاره همکاري ده

د ښځو د هیلو کړکۍ غورځنګ  د افغان کډوالو د جبري او پراخ ایستلو په غبرګون کې، چې له ایران، پاکستان او تاجکستان څخه ترسره کېږي، یوه خبرپاڼه خپره کړې او خبرداری یې ورکړی چې دا کار د بشر د اساسي حقونو او د کډوالو د نړیوالو کنوانسیونونو ښکاره نقض دی، او راستنېدونکې ښځې له جدي خطرونو سره مخ کوي.په دې اعلامیه کې، چې نن خپره شوې، راغلي دي چې د افغان ښځو او نجونو بېرته ستنول هغه هېواد ته چې د طالبانو له‌خوا په کې بشپړ جنسیتي توپیر حاکم شوی، د دوی د ژوند «دوزخ» ته سپارل دي. هلته له دوی د زده‌کړې، کار، تګ راتګ او له کرامت سره د ژوند حق اخیستل شوی دی.د «هیلو کړکۍ» غورځنګ دا جبري او میلیوني ایستل نه یوازې د جبري ایستلو بندیز (non-refoulement) د اصل خلاف بولي، بلکې دا یې د یو ښځه‌دښمن رژیم سره ښکاره همکاري ګڼلې ده.په دې اعلامیه کې د دغو ایستنو د ناورینونو پایلې یادې شوې دي:د قانون او ټولنیز ملاتړ له نشتوالي سره د جنسي او جنسیتي تاوتریخوالي زیاتوالی؛د ښځو او نجونو ترمنځ د ځان‌وژنو د پېښو زیاتوالی، په ځانګړي ډول د زده‌کړو له محرومېدو وروسته؛د سرپرست پرته کورنیو ترمنځ د بشري ناورین ژورتیا؛د زرګونو ښځو او ماشومانو ترمنځ بې‌کوره‌توب، مطلق بیوزلي او بې‌هویتي.دا غورځنګ د افغان کډوالو د ایستل سمدستي درولو غوښتنه کړې ده.په خبرپاڼه کې همداراز راغلي دي: «موږ، ښځې، که په جلاوطنۍ کې هم یو، غلي نه پاتې کېږو. زموږ غږ د هغو ښځو فریاد دی چې د طالب له درو لاندې د ژوند د یوه وړوکي امید په لټه کې دي. جبري ایستل یې، د آرمانونو، وړتیاوو او انساني کرامت ډله‌ییز قبر دی.»د ښځو غورځنګ «هیلو کړکۍ» چې مرکز یې په اسلام‌‎آباد، پاکستان کې دی، ویلي چې د افغان ښځو د حقونو لپاره به خپلې مبارزې ته، که په کور دننه وي او که په جلاوطنۍ کې، دوام ورکړي.