ملګري ملتونه: له دوه میلیونو زیات افغانان بېرته راستانه شوي، بشردوستانه بحران یې لا سخت کړی

د ملګرو ملتونو د کډوالو عالي کمېشنرۍ (UNHCR) د یوې اعلامیې له مخې چې په اکس کې خپره شوې، تر اوسه له دوه میلیونو زیات افغان کډوال بېرته هېواد ته راستانه شوي دي، خو یاد سازمان وایي چې ډېری دا راستنېدنې د فشار له امله او غیر اختیاري ترسره شوي دي.په اعلامیه کې ویل شوي، دا پراخ اجباري بېرته‌ ستنېدنه، چې له ایران او پاکستان نه دوام لري، د افغانستان پر محدودو سرچینو او کمزوري ملاتړ سیستمونو سخت فشار راوستی او بشري وضعیت یې لا خراب کړی دی.ملګري ملتونه ټینګار کوي چې دا ډول جبري راستنېدنې د کډوالو د ساتنې له نړیوالو اصولو سرغړونه ده او کولای شي په افغانستان کې د بشري ناورین کچه نوره هم لوړه کړي.یاد سازمان زیاتوي، په داسې حال کې چې افغانستان له امنیتي او اقتصادي بې‌ثباتیو سره مخ دی، دا ناڅاپي بېرته‌ستنېدنه بېړنی نړیوال ملاتړ غواړي، څو د سرپناه، خوړو، روغتیا او لومړنیو خدماتو برخه کې عاجلې مرستې برابرې شي.ملګري ملتونه له ګاونډیو هېوادونو او نړیوالې ټولنې غوښتنه کړې چې د افغان کډوالو په زور بېرته لېږلو سره مخالفت وکړي او پر ځای یې انساني او د کډوالو د حقونو درناوي ته ژمن حل‌لارې غوره کړي.