د ملګرو ملتونو د پراختيايي پروګرام: له ۳۸ زرو زیاتې افغان مېرمنې د لمر انرژۍ له لارې پاکو اوبو ته نږدې شوې دي

د ملګرو ملتونو د پراختیا پروګرام (UNDP) خبر ورکړی چې د افغانستان په کندهار، بلخ او پکتیا ولایتونو کې ۱۶ نوې لمریزې دستګاوې د اوبو رسولو شبکو ته د برېښنا د برابرولو لپاره نصب شوي دي.یاد بنسټ په خپله اکس پاڼه کې لیکلي، دا ګام د ABADEI پروژې د دویم پړاو یوه برخه ده، چې موخه یې په یادو سیمو کې خلکو ته د دوامداره او پاکو اوبو د لاسرسي ښه‌والی دی.د UNDP د راپور له مخې، تر دې دمه نږدې ۷۶ زره تنه له دې خدماتو ګټه اخیستې، چې له نیمایي زیات یې، یعنې شاوخوا ۳۸ زره یې ښځې دي. د لمریزو سیستمونو کارول، د اوبو رسونې شبکې له دوامداره برېښنا سره سمبالې کړي، لګښتونه یې کم کړي او د برېښنا د پرې کېدو ستونزه یې هم راټیټه کړې ده.په راپور کې ویل شوي چې په افغانستان کې پاکو اوبو ته لاسرسی له جدي ننګونو څخه دی، او ښځې چې ډېر وخت د اوبو راټولولو مسؤلیت لري، له دې پروژې تر ټولو زیاتې اغېزمنې شوي دي. دا سیستمونه نه یوازې چاپېریال ته زیان نه رسوي، بلکې کورنیو ته پاکو اوبو ته لاسرسی هم اسانه کړی دی.د یادونې وړ ده چې دا پروژه د “د انرژۍ د دوامداره لیږد د ملاتړ پروګرام” (UN STFA) په ملاتړ عملي شوې، او د ملګرو ملتونو د هغو هڅو یوه برخه ده چې د افغانانو د ژوند د کیفیت لوړولو او دوامدار پرمختګ لپاره روانې دي.