له ګاونډیو هېوادونو څخه په یوه ورځ کې تر زرو ډېرې د افغان کډوالو کورنۍ هېواد ته ستنې شوې

د طالبانو تر کنټرول لاندې د باختر خبري آژانس راپور ورکړی چې پرون يو زرو او ۱۱۴ د افغان کډوالو کورنۍ د ننګرهار تورخم، د کندهار سپین بولدک، د نیمروز د پل ابریشم او د هرات د اسلام‌قلعه له پولو افغانستان ته ستنې شوې دي.د راپور له مخې، ۲۰۲ کورنۍ د تورخم، ۹۲ کورنۍ د سپین بولدک، ۱۱۰ کورنۍ د پل ابریشم او ۷۱۰ کورنۍ د اسلام‌ قلعه له لارې هېواد ته داخلې شوې دي.دا خبري آژانس زیاتوي چې دغو کورنیو د ستنېدو پر مهال د بشردوستانه ادارو له مرستو ګټه اخیستې څو د دوی د ستنېدو بهیر په خوندي او منظم ډول ترسره شي.ملګرو ملتونو بیا ټینګار کړی چې د دغو بېرته ستنېدونکو ملاتړ اړین دی، ځکه چې اقتصادي او امنیتي کړکېچونه د میلیونونو افغانانو ژوند تر سخت فشار لاندې راوستی دی. یادې ادارې له نړیوالې ټولنې غوښتي چې خپلې بشردوستانه مرستې ډېرې کړي او د افغانستان له حکومت سره په ګډه د بېرته ستنېدونکو لپاره بنسټیز خدمتونه او د ژوند د برابرولو فرصتونه چمتو کړي څو د دوی ژوند بېرته ښه شي.په وروستیو میاشتو کې له ګاونډیو هېوادونو، په ځانګړي ډول له پاکستان، ایران او د سیمې له نورو هېوادونو د افغان کورنیو ستنېدل، په افغانستان کې د لویو بشردوستانه ستونزو یوه جدي ننګونه ګرځېدلې ده.اقتصادي فشارونه، سیمه‌ییزې ناامنۍ او سیاسي بندیزونو د دې لامل شوي چې زرګونه کورنۍ د اوسېدو له ځایه ولاړې شي او هېواد ته ستنېدلو ته اړې شي. خو اجباري او له دقیق پلان پرته ستنېدل کولای شي د دغو کورنیو وضعیت، چې ډېری یې له سختو شرایطو سره مخ دي، لا کړکېچن کړي. ډېرې یې د د اوسیدو ځای، خوړو، روغتیایي خدمتونو او زده‌کړو د برابرولو له ستونزو سره مخ دي او د عاجلو او پراخو مرستو ته اړتیا لري.