د ملګرو ملتونو د بشري مېشتېدو د پروګرام مشره: ډېری بېرته ستنېدونکي افغانان خوندي ځای نه لري

استفاني لوز، چې د ملګرو ملتونو د بشري مېشتېدو د پروګرام مشره ده، د زمري په ۱۷مه، د جمعې په ورځ په جنیوا کې په یوه خبري ناسته کې د بېرته ستنېدونکو افغانانو د سخت وضعیت په اړه خبرې وکړې.هغې د ګاونډیو هېوادونو له لوري د کډوالو د پراخ شړلو په اړه وویل چې افغانستان له یوې بې مخینې او ګواښوونکې بحراني وضعې سره مخ دی.د استفاني لوز په وینا، میلیونه کسان په زور یا په خپله خوښه له ایران او پاکستانه افغانستان ته ستنېږي، خو ډېری یې کور، شتمني او آن هیلې له لاسه ورکړي او په خپل وطن کې د اوسېدو ځای نه لري.هغې زیاته کړه چې ۶۰ سلنه بېرته ستنېدونکي له ۱۸ کلونو کم عمر لري او له افغانستان سره کافي ټولنیزې اړیکې نه لري چې دا کار ورته خطرناک دی.د ملګرو ملتونو د بشري مېشتېدو د پروګرام مشره ټینګار وکړ چې د ډېرو لپاره ستنېدل د ادغام پر ځای د یوې نوې پیل په مانا دي.هغې وویل، په هغو سیمو کې چې بېرته ستنېدونکي اوسېږي، اړینه ده چې یوه همغږې شوې تګلاره وي تر څو دوی د مناسب کور، د اوبو او روغتیایي خدمتونو او د ژوند د برابرولو له فرصتونو څخه برخمن شي.استفاني لوز څرګنده کړه چې دا یوه لویه بشري ناورین دی چې که سیمه‌ییز ملاتړ او نړیواله همکاري ورسره نه وي، ښايي د افغانستان او سیمې لپاره پراخ او اوږدمهاله زیانونه ولري.د کډوالۍ د نړیوال سازمان د شمېرو له مخې، له سپټمبر ۲۰۲۳ تر اوسه پورې له څلورو میلیونو ډېر کډوال له ایران او پاکستانه افغانستان ته ستنېدلي دي.یاد سازمان همدارنګه اټکل کړی چې د پاکستان د وروستي پرېکړې له مخې چې د کډوالو د استوګنې موده نه غځوي، ښايي په روان کال کې له یو میلیونه ډېر نور کسان هم هېواد ته ستانه شي.د ملګرو ملتونو د بشري مېشتېدو د پروګرام مشره په پای کې له نړیوالې ټولنې وغوښتل چې افغانستان هېر نه کړي او په ځانګړي ډول د ښځو او نجونو وضعیت په پام کې ونیسي.