د افغانستان د ښځو د تاریخ د بدلون غورځنګ: د زمري ۱۵ مه د تیارو او ځپنې د نوې مرحلې پیل ګڼل شوی

د افغانستان د ښځو د تاریخ د بدلون غورځنګ د زمري د ۱۵ مې د کلیزې په مناسبت په خپره شوې اعلامیه کې یادې نېټې ته د جمهوریت د سقوط او د «تیارو، ځپنې او د بشري حقونو د پراخ نقض» د نوې مرحلې د پیل په توګه اشاره کړې ده.په اعلامیه کې راغلي چې له دې نېټې وروسته افغانستان د «آزادۍ، انساني کرامت او د میلیونو وګړو په ځانګړي ډول د ښځو، نجونو او قومي او مذهبي لږکیو د بنسټیزو حقونو د ارام قبرستان» په بڼه بدل شوی دی.د دې غورځنګ په وینا، ښځې د زده کړو، کار، سیاسي او ټولنیز ګډون له حق څخه بې‌برخې شوي دي او دغه کړنې د نړیوالو معتبرو اسنادو لکه د بشري حقونو نړیوالې اعلامیې، د ښځو د له تبعیضه د خلاصون کنوانسیون او د ملکي او سیاسي حقونو نړیوال میثاق سره په ټکر کې دي.یاد غورځنګ د وینا د آزادۍ ځپل، د مدني فعالانو نیول او شکنجه، پر لږکیو فشار او د شریعت د افراطي تفسیر پر بنسټ د توپیریزو قوانینو تپول «د بشریت پر وړاندې د جنایت څرګندې بېلګې» بللې دي او نړیواله ټولنه یې د بې‌ پروايۍ او چوپتیا په تور یاده کړې ده.دغه غورځنګ په اوو مواردو کې خپلې مشخصې غوښتنې وړاندې کړي چې پکې د نجونو لپاره د ښوونځیو او پوهنتونونو پرانیستل، د ښځو بېرته کاري ډګر ته ستنېدل، د طالبانو پر مشرانو موخه ییزو بندیزونه، د بشري حقونو د ځانګړو راپور ورکونکو لېږل، د طالبانو بې‌ وسلې کول، د پراخ شمول لیږد حکومت جوړول او د نړیوالې ټولنې له لوري د افغانستان له ولس سره د افراطیت پر وړاندې ملاتړ شامل دي.په پای کې په اعلامیه کې ویل شوي: «چوپتیا د ظلم پر وړاندې، له ظالم سره همکاري ده. تاریخ به دا چوپتیا هېره نه کړي.»یاده دې وي چې د ۲۰۲۱ کال د زمري په ۱۵ مه نېټه طالبان پرته له جدي مقاومت څخه کابل ته ننوتل او د افغانستان جمهوري نظام ونړېد. د پخواني دولت له سقوط وروسته، اشرف غني، هغه مهال د هېواد ولسمشر، هېواد پرېښود او واک د طالبانو لاس ته ولوېد.