د افغانستان د رسنیو د ملاتړ سازمان: په درېیمو هېوادونو کې د افغان خبریالانو وضعیت د اندېښنې وړ دی

د افغانستان د رسنیو د ملاتړ سازمان د یوې اعلامیې په خپرولو سره په درېیمو هېوادونو، په ځانګړي ډول په پاکستان او ایران کې د مېشتو افغان خبریالانو د سخت وضعیت په اړه خبرداری ورکړی دی.په اعلامیه کې ویل شوي چې د سازمان مشرتابه د دغو هېوادونو له مېشتو خبریالانو سره په یوه آنلاین ناسته کې د هغوی بنسټیزې ستونزې اورېدلې دي؛ ستونزې لکه د ویزې نه غځول، د پولیسو له خوا د رسمي مکتوبونو نه منل، د امنیتي فشارونو ډېرېدل او اقتصادي ستونزې. سازمان ټینګار کړی چې د دغو ستونزو د حل لپاره به خپلې ټولې هڅې وکړي.یاد سازمان له نړیوالو ادارو غوښتي چې د مدافع وکیلانو د ګمارنې لپاره مالي ملاتړ، د ملاتړ صندوق جوړول او د کوربه هېوادونو له حکومتونو سره همکاري وکړي، څو د افغان خبریالانو د ساتنې او د هغوی د ظرفیت د لوړولو زمینه برابره شي.دغه راز، سازمان د بااعتباره پېژندپاڼو د وېش او د تبعیدي خبریالانو لپاره د مسلکي روزنیزو کورسونو د جوړېدو غوښتنه کړې ده.د افغانستان د رسنیو د ملاتړ سازمان ټینګار کړی چې د افغان خبریالانو د وضعیت دوامداره څارنه به د دې ادارې د کاري لومړیتوبونو په سر کې وي او له نړیوالې ټولنې یې غوښتي چې د دې مهم او زړور قشر په ملاتړ کې جدي او بېړنۍ همکاري وکړي.