په غور کې د پخواني ملي اردو یو سرتېری په ډزو ووژل شو

د طالبانو له لوري د پخوانیو نظامیانو د وژنې په دوام، د غور د فیروزکوه ښار د تقه تیمور کلی اوسېدونکي باوري سرچینې وایي چې د زمري په ۱۹مه، الله‌ داد چې د ملي اردو پخوانی سرتېری و، د طالبانو له خوا ونیول شو او وروسته په ډزو ووژل شو.د وژل شوي کس یوه خپلوانه، صدیقه، راوي ښځې ته وویل چې الله‌ داد نیمه شپه د طالبانو له خوا د “یامه بوټي” د زېرمه کولو په تور ونیول شو او بیا یې ووژلو. هغې زیاته کړه چې نوموړی له هېڅ وسله‌ والې ډلې سره تړاو نه درلود او د جمهوریت له سقوط وروسته یې د کرنې په کار بوخت و.د کلی یوې بلې ښځې، جمعه‌ ګل، د طالبانو کړنې وغندلې او د دې ډلې عمومي عفو یې د پخوانیو نظامیانو د راجلبولو او د هغوی د وژلو لپاره چل بولي. هغې وویل چې طالبانو په تېرو دوو لسیزو کې د دې کلي لسګونه نارینه وژلي، سلګونه ماشومان یې یتیمان کړي او ګڼ شمېر ښځې یې کونډې کړي دي، او دا لړۍ لا روانه ده.په تېرو دوو اونیو کې دا په غور کې د پخوانیو نظامیانو درېیمه وژنه ده چې د قربانیانو کورنۍ طالبان په مستقیم ډول د خپلو خپلوانو په وژنه تورنوي. طالبانو تر اوسه دا پېښه نه ده تائید کړې او نه یې رد کړې ده.د یادونې وړ ده چې د بشري حقونو بنسټونه تل د طالبانو د عمومي عفوې د نه عملي کېدو او د دې ډلې د غړو له لوري د پخوانیو نظامیانو د غچ اخیستنې په اړه اندېښنه ښودلې او د دغو وژنو او ځورونو د درولو غوښتنه کړې ده.