د طالبانو د واک څلورمه کالیزه؛ د ښځو د «د هیلې کړکۍ» غورځنګ د طالبانو د مشرانو نړیواله محاکمه وغوښته

د ښځو «د هیلې کړکۍ» غورځنګ د افغانستان د واک د طالبانو ته د بېرته ستنېدو څلورمې کالیزې په مناسبت په خپره شوې اعلامیه کې دغه ډله د «سیستماټیک جنسیتي توپیر» او «د بشریت پر ضد د جنایتونو» په ترسره کولو تورنه کړې او د دې ډلې د مشرانو نړیواله محاکمه یې غوښتې ده.په اعلامیه کې ویل شوي چې په تېر څلورو کلونو کې د «تیارو، وېرو، محرومیت او د بشري حقونو پراخو سرغړونو» سره تېر شوي، او ښځې، نجونې، مدني فعالان، خبریالان او قومي او مذهبي لږکۍ د «تر ټولو بې‌رحمانه ډولونو د ځپنې» لاندې راغلي دي.غورځنګ ویلي چې طالبان د سختو بندیزونو په لګولو سره ښځې له زده‌کړو، کار او سیاسي او ټولنیزې ونډې څخه محرومې کړي، لسګونه ښځې او مدني فعالان یې نیولي، زورزیاتي یا ناپېیلي کړي دي. همدارنګه یې د عام محضر کې اعدامونو، علني دورو وهلو، د غړو پرېکولو او نورو بدني سزاوو یادونه کړې چې د دې ډلې له لوري د بشري حقونو جدي سرغړونې ګڼل کېږي.اعلامیه د طالبانو مشر او د دوی قاضي‌القضات «د ظالمانه حکمونو د صادرولو او پلي کولو مستقیم مسوول» بللی او د آلمان او روسیې په ګډون د ځینو هېوادونو له سیاسي او امنیتي تعامل سره یې د بشري حقونو له وضعیت پرته، دا چلند «د ښځو ضد او ترهګریز رژیم مشروعیت ورکول» یاد کړي دي.د ښځو «د هیلې کړکۍ» غورځنګ له نړیوالې جزایي محکمې (ICC)، ملګرو ملتونو او د بشري حقونو له مدافع بنسټونو غوښتنه کړې چې:۱. د طالبانو د جنایتونو دوسیه په رسمي ډول په نړیوالو مراجعو کې تعقیب کړي؛۲. د دې ډلې مشران عدلي تعقیب ته وسپاري؛۳. د طالبانو د جنایتونو د ثبت او اسنادو لپاره د حقیقت‌موندنې او ځواب‌ویینې میکانیزم جوړ کړي؛۴. له طالبانو سره هر ډول رسمي تعامل تر هغه وخته وځنډوي چې د بشري حقونو سرغړونې په بشپړ ډول ودرېږي.غورځنګ په پای کې ټینګار کړی: «طالبانو ته مشروعیت ورکول، جنایت ته مشروعیت ورکول دي. د نړۍ چوپتیا د دورې وهلو، اعدام او جنسیتي توپیر د تایید معنا لري.»