د جولای په میاشت کې په آلمان کې د افغان ښځو پناه غوښتنې په بې‌ساري ډول ډېرې شوې دي

د آلمان د فدرالي کډوالۍ او پناه غوښتنې ادارې (BAMF) د نوې شمېرو له مخې، د ۲۰۲۵ د جولای په میاشت کې د افغان ښځو د پناه غوښتنو شمېر بې‌ساری زیات شوی دی.یوازې په همدې میاشت کې له ۳۱۰۰ څخه ډېرې افغان ښځې د پناه غوښتنې لپاره ثبت شوې دي چې دا شمېر د تېرې میاشتې په پرتله له دوو برابرو ډېر دی. له روان کال راهیسې په ټوله کې شاوخوا ۹۵۹۳ غوښتنې ثبت شوې چې نږدې نیمایي یې د اوسيدو د تمدید یا بیا غوښتنې په اړه دي.اداره ټینګار کوي چې له ۲۰۲۱ کال وروسته چې طالبان پر افغانستان واکمن شو، د افغان ښځو او نجونو ژوند په سیسټماتیک ډول خراب شوی او له عامه ډګرونو پراخه توګه محرومې شوې دي، چې دا حالت پناه غوښتنې یې ډېرې کړي دي.د دې زیاتوالي یو مهم لامل د اروپايي ټولنې د سترې محکمې هغه حکم دی چې د ۲۰۲۴ د خزان په وروستیو کې صادر شو او پکې ویل شوي چې طالبان په ټولیز ډول ښځې تعقیبوي او د هغوی لپاره جدي خطرونه شته. د دې حکم له مخې، د افغان ښځو د پناه ترلاسه کولو امکان ډېر لوړ ارزول شوی دی.سره له دې چې د افغان ښځو غوښتنې زیاتې شوې دي، د جولای په میاشت کې د آلمان د ټولو پناه غوښتنو شمېر کم شوی او یوازې شاوخوا ۱۳۷۰۰ غوښتنې (لومړنۍ او بیا غوښتنې) ثبت شوې چې د تېر کال د همدې مودې په پرتله د پام وړ کموالی ښيي.