د دایکنډي او بامیانو په ولایتونو کې د «نسیم» راډیو خپرونې د ۱۳ کلونو فعالیت وروسته بندېږي

د خبریالانو او د «نسیم» راډیو د کارکوونکو د پرله‌پسې نیولو او پر دې رسنۍ د سختو بندیزونو له امله، چارواکو یې پرېکړه کړې چې له ۱۳ کلونو فعالیت وروسته په دایکنډي او بامیانو کې خپرونې ودروي.«نسیم» راډیو په خپله فېسبوک پاڼه کې په یوه خپره شوې اعلامیه کې د دې پرېکړې دلیل «د زمانې بې‌رحمي چې کله کله غږونه نه شي زغملای» یاد کړی او خپلو اورېدونکو ته یې ویلي دي:«دیارلس کاله د هیلې، مینې، پوهاوي او ژوند غږ وو. د دایکنډي او بامیانو له غرو، کوڅو او کلیو، د دردونو او خوښیو له منځه له تاسې سره وو. واورېدلو، مو ویل، مو ژړل او وخندل، خو نن په یوه د غم ډک زړه باید ووایو: نور نه شو کولای دوام ورکړو.»په اعلامیه کې زیاته شوې چې که شرایط ښه شي، بیا به خپرونې پیل کړي، خو دا چې دا ښه والی به کله او څنګه راشي، وخت به یې روښانه کړي.«نسیم» راډیو په تېرو ۱۳ کلونو کې په دواړو ولایتونو کې زیاتره سیاسي، کلتوري، ټولنیز او تفریحي پروګرامونه جوړول او خپرول.له دې وړاندې هم د دې راډیو مسوولین او خبریالان څو ځله د بې‌ اساسه تورونو او بېلابېلو پلمو له مخې د طالبانو لخوا نیول او بندیان شوي دي. په تازه پېښه کې، تېره اوونۍ د استخباراتو ادارې د دې راډیو مسؤول مدیر سلطان‌علي جوادي او خبریالان سیف‌الله رضایي او مجتبی قاسمي ونیول او وروسته یې آزاد کړل.په تېرو څلورو کلونو کې په افغانستان کې ازادې رسنۍ تل د سانسور او سختو بندیزونو سره مخ وې او ګڼ شمېر یې اړ شوي چې خپرونې ودروي.