د ایران د جبري ایستلو د څپې له زیاتېدو سره، یو هراتي کډوال ۱۶ کسانو ته چې ۹ ښځې پکې دي، د کار زمینه برابره کړې ده

امین، چې تازه له ایران څخه هېواد ته راستون شوی، د ملګرو ملتونو د کډوالو د عالي کمیشنرۍ په مالي مرسته په هرات کې د جرابو اوبدلو یوه کارګاه پرانیستې ده.ده ویلي، دا کارګاه نه یوازې د کار زمینه برابروي، بلکې د زیان‌منو کورنیو لپاره ثابت عاید هم رامنځته کوي.ریحانه سادات، چې له ایران څخه ایستل شوې او اوس په همدې کارګاه کې کار کوي، د دغسې نوښت هرکلی کړی او د ښځو لپاره د لا ډېرو کاري فرصتونو غوښتنه کړې ده. هغې زیاته کړې: «په ایران کې به په د ګنډلو په یوه کارګاه کې کار کاوه او لګښتونه مو پوره کېدل، خو دلته چې راغلو، کار نشته. که د ګنډلو یا جرابو اوبدلو کارګاه وي، موږ کار کوو ځکه اړ یو خپل لګښتونه پیدا کړو.»د ملګرو ملتونو د شمېرو له مخې، په تېرو درې میاشتو کې له یو میلیون زیات کډوال چې ډېری یې له ایران څخه دي افغانستان ته راستانه شوي، چې یوه لویه برخه یې ښځې دي.په همدې حال کې، له طالبانو وروسته په هرات کې د نارینه‌وو د کار فرصتونه کم شوي او د ښځو لپاره نږدې له منځه تللي دي. په لږو هغو برخو کې چې ښځو ته د کور نه بهر د کار اجازه ورکول کېږي، د «شرعي محرم» شتون اړین بلل کېږي، چې د مدني فعالانو په باور، د ښځو د ټولنې څخه د لرې کولو او د هغوی د ځپلو یوه بڼه ده.