استفاني لوس: د افغانستان ښځې او نجونې مه هېروئ

استفاني لوس، په افغانستان کې د ملګرو ملتونو د میشتېدو د پروګرام د دفتر رییسه، د بېرته راستانه شوو کډوالو د وضعیت په اړه د اندېښنې په څرګندولو سره له مرسته کوونکو هېوادونو غوښتنه کړې چې د افغانستان خلک، په ځانګړي ډول ښځې او نجونې، په اوسنیو ستونزمنو شرایطو کې یوازې پرې نه ږدي.نوموړې د زمري په ۲۱مه، د سه‌شنبې په ورځ، په یوه پیغام کې خبرداری ورکړی چې افغانستان له تېرو لسیزو راهیسې د کډوالو د بېرته ستنولو له یوه ستر جبري څپې سره مخ دی.د هغې په وینا، یوازې سږ کال له ایران او پاکستان څخه تر یو میلیون زیات افغانان په جبري توګه شړل شوي چې ډېری یې بې له کوره، شتمنۍ او د راتلونکي له لږې هیلې هېواد ته دننه شوي دي.لوس ویلي چې بېرته راستانه شوي نه یوازې خپل سرپناه له لاسه ورکړی، بلکې د بیوزلي او  انحصار په کړۍ کې ګېر پاتې دي. هغې زیاته کړه چې په وروستۍ ناسته کې د ملګرو ملتونو په جنیوا کې له نړیوالې ټولنې غوښتنه شوې چې د بشري مرستو کچه لوړه کړي، څو دغه کسان وکولای شي خپل کور، معیشت او راتلونکی بیا جوړ کړي.په تېرو دوو کلونو کې، په ګاونډیو هېوادونو کې اقتصادي او سیاسي فشارونو، په ځانګړي ډول په ایران او پاکستان کې، د افغان کډوالو د جبري ایستلو بهیر ګړندی کړی دی.مرستندوی سازمانونه خبرداری ورکوي چې د کاري فرصتونو نشتوالی، ناامنۍ او ټولنیز بندیزونه په افغانستان کې د دې زیان‌من قشر حالت لا پسې کړکېچنوي. د نړیوالو ادارو د شمېرنو له مخې، ډېری بېرته راستانه شوي کسان د پولو په سیمو کې بې له کافي ملاتړ څخه پرېښودل کېږي، چې دا به اوسنی بشري بحران لا پسې ژور کړي.