د امریکا د بهرنیو چارو وزارت تازه راپور: طالبانو د وینا او رسنیو ازادي په کلکه توګه محدوده کړې

د امریکا د بهرنیو چارو وزارت په خپل د ۲۰۲۴ زېږدیز کال د بشري حقونو کلني راپور کې ویلي، چې طالبان په دغه کال کې د خبریالانو او معترضینو پر وړاندې د زور له لارې سیاسي او مدني فضا تر سخت فشار لاندې راوستې ده.راپور چې د یوناما، رسنیو او خپلواکو سرچینو پر موندنو ولاړ دی، څرګندوي چې د طالبانو پر ضد عامه نیوکې، که د افرادو له لوري وې او که د ډلو، په تېر کال کې نږدې په بشپړ ډول غلې شوې دي. ټولنیز غونډې او عامه ویناګانې، که په مجازي فضا کې وې او که په حضوري ډول، د طالبانو د ځواکونو تر سخت څار لاندې ترسره کېدې.د امریکا د بهرنیو چارو وزارت د معلوماتو له مخې، طالبانو په وار وار د خلکو موبایل ټېلفونونه او برقي وسایل د دې لپاره ضبط کړي چې انتقادي مطالب، له بهرنیو هېوادونو سره اړیکې یا د خپلو فرمانونو خلاف مواد په کې پیدا کړي.همدارنګه راپورونه شته چې دغه ډله د ښځینه خپلوانو د څرګندونو یا کړنو له امله د کورنیو نارینه غړي پوښتنې او ځورونې ته راوبللي دي.راپور زیاتوي چې طالبانو په انتخابي ډول د انټرنېټ لاسرسی محدود کړی او ځینې وېب‌سایټونه بند کړي دي. په هغو سیمو کې چې مخالفین فعال وو یا له سیاسي ترینګلتیا وروسته، دوی کله ناکله انټرنېټ پرې کړی یا یې سرعت ډېر راکم کړی دی.د امریکا د بهرنیو چارو وزارت یادونه کړې چې د افغانستان د ۲۰۰۴ کال اساسي قانون د وینا او رسنیو د فعالیت ازادي تضمین کړې وه؛ خو طالبانو د ۲۰۲۱ کال د نومبر په میاشت کې د یو لړ فرمانونو په صادرولو سره دغه ازادۍ په شدیده توګه محدوده کړې، که څه هم په ښکاره یې د رسنیو د ملاتړ ادعا کړې ده.