د افغانستان د ښځو د سیاسي ګډون غورځنګ: د طالبانو جنایتونه باید پای ته ورسېږي

د افغانستان د ښځو د سیاسي ګډون غورځنګ د هېواد د سقوط څلورمه کالیزه په مناسبت یوه اعلامیه خپره کړې او د اګست ۱۵ یې د افغانستان د تاریخ تور ورځ بللې ده.په دې اعلامیه کې ویل شوي چې په تېرو څلورو کلونو کې ښځې او نجونې په سیسټماتیک ډول له خپلو ټولنیزو، سیاسي او ښوونیز حقونو محرومې شوې او هېواد د ظلم، وېرې، بیوزلي، شکنجې، بند، سپکاوي او بې‌عدالتۍ شاهد و.غورځنګ ویلي چې نړیواله ټولنه د افغانستان د خلکو تر څنګ ونه درېده، او د طالبانو د اړیکو عادي کول د خلکو د عزت، امنیت او آزادۍ په قرباني کېدو تمام شوي دي.دغه غورځنګ له نړیوالې ټولنې غوښتي چې:د طالبانو جنایتونه د جنسیتي اپارتاید په توګه په رسمیت وپېژني؛د طالبانو مشران تر بندیز او نړیوالې قانوني تعقیب لاندې راولي؛هېڅ هېواد طالبان په رسمیت و نه پېژني او ورسره همکاري ونه کړي؛ملګري ملتونه او نړیوال بنسټونه د افغانستان د خلکو تر څنګ ودرېږي.د افغانستان ښځو په دې اعلامیه کې ټینګار کړی چې د خپلو شهیدانو او اتلانو د اتلولیو په یاد، تر آزادۍ، عدالت او برابري پورې مبارزه ته دوام ورکوي او طالبان د افغانستان د خلکو استازولي نه کوي.دغه شبکه د اګست ۱۵ د خلکو د یووالي، مقاومت او د عدالت غوښتنې د فریاد ورځ بللې او خبرداری یې ورکړی چې «افغانستان هېر شوی نه دی».